भांगरभूंय | प्रतिनिधी
पणजीः राज्यांत मंत्रीमंडळ फेरबदलाचेर बऱ्याच दिसा सावन चर्चा चालू आसतना गोंय भाजपा प्रदेशाध्यक्ष दामू नायक हांणी आयज दिल्लींत राष्ट्रीय सरचिटणीस बी. एल. संतोष हांची भेट घेतली. पक्षाच्यो येवपी कार्यावळी आनी संघटने संबंदी चर्चा जाल्ल्याची म्हायती दामू नायक हांणी दिली.
मुख्यमंत्री डॉ. प्रमोद सावंत आयज सांज मेरेन आसामांतल्यान दिल्ली वतले. दिल्लींत वेगवेगळ्या फुडाऱ्यांक मेळून वेगवेगळ्या विशयांचेर चर्चा करतले अशी म्हायती मुख्यमंत्र्यान दिली. हे फांटभूंयेर भाजपा प्रदेशाध्यक्ष दामू नायक अचकीत दिल्लींत गेलें. तशेंच पक्षाचे फुडारी आनी खासदार अरुण सिंग आनी कार्यालयाचे सचीव अरुण पांडेय हांची भेट घेतली. येवपी दिसांनी गोंयांत प्रदेश संघटनात्मक कार्यशाळा जातली. हे कार्यशाळे वांगडाच तांणी संघटनेचेर भासाभास केल्ल्याची म्हायती मेळटा.
गोविंद गावडे हांकां मंत्रीपदा वयल्यान काडले उपरांत एक मंत्रीपद रितें आसा. विधानसभा अधिवेशन उपरांत मंत्रीमंडळांत फेरबदल जातलो असो संकेत मुख्यमंत्री डॉ. सावंत हांणी जुलयात दिल्लींत गेल्लें तेन्ना दिल्लो. आतां पावसाळी अधिवेशन सोंपिल्ल्यान परतून मंत्रमंडळ फेरबदलाचेर चर्चा सुरु जाल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
