भांगरभूंय | प्रतिनिधी
9 खात्यांतल्या 33 प्रकरणांत 4.90 कोटींचो गैरवेव्हार
पणजीः सरकाराच्या 9 खात्यांनी गैरवेव्हार जाल्ल्या 33 प्रकरणांत अजून कारवाय जावंक ना. गैरवेव्हारांचो आंकडो 4 कोटी 9 लाख रुपया आसा अशें महालेखापालांनी (कॅग) अहवालांत म्हणलां. पुलीस, नागरी पुरवण, खेळां आनी युवा वेव्हार, येरादारी, पंचायत, उत्तर गोंय जिल्लोधिकारी, वीज खातें, अंतर्गत उदकामार्ग आनी भलायकी ह्या खात्यांतल्या गैरवेव्हारांच्या 33 प्रकरणांचेर कारवाय प्रलंबीत आसा.
कितली वर्सां गैरवेव्हारांची प्रकरणां प्रलंबीत आसात आनी तातूंतल्या अर्थीक गैरवेव्हारांचो आंकडो महालेखापालांनी अहवालांत नमूद केलां. नागरी पुरवण खात्यांत गैरवेव्हारांची 3 प्रकरणां 10 वर्सां परस चड काळ प्रलंबीत आसात. ह्या तिनूय प्रकरणांत वट्ट 5.92 लाख रुपयांचो गैरवेव्हार जाला. येरादारी खात्यांत 1 जाल्यार पंचायत संचालनालयांत 16 प्रकरणां प्रलंबीत आसात. येरादारी खात्यांतली फटवणूक 8.13 लाख जाल्यार पंचायत संचालनालयांतल्या 16 प्रकरणांत 5.86 लाखांची रक्कम आसा.
पंचायत संचालनालयांतल्या 16 प्रकरणांतल्यान 9 प्रकरणां कारवाय करपा खातीर 10 वर्सां प्रलंबीत आसात. वीज खात्यांत प्रलंबीत आशिल्ल्या 6 प्रकरणांत 1 कोटी 48 लाख रुपयांची रक्कम आसा. ६ प्रकरणांतली 5 प्रकरणां 10 वर्सां परस चड काळ प्रलंबीत आसात. अंतर्गत उदकामार्ग खात्यांत 3 प्रकरणांत 19.93 लाखांचो गैरवेव्हार जाला. भलायकी खात्यांत प्रशासकीय वैजकी अधिकाऱ्यांच्या कार्यालयांत 3 कोटी 54 लाखांचो गैरवेव्हार जाल्ल्या प्रकरणांत कसलीच कारवाय जावंक ना अशें महालेखापालांनी अहवालांत म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
