बोगस मतदार विशया वयल्यान काँग्रेस देंवले रस्त्यार

भांगरभूंय | प्रतिनिधी

मोर्चो आडावन पुलिसांनी घेतले कार्यकर्त्यांक ताब्यांत

भांगरभूंय । प्रतिनिधी
पणजीः बोगस मतदार विशया वयल्यान काँग्रेसीन गोंय निर्वाचन अधिकाऱ्यांचे कचेरेर मोर्चा व्हेलो. पूण पुलिसांनी तांचो मोर्चा अर्दे वाटेरुच आडावन दवरलो. पुलिसांनी फुडें वचपाक दिना ह्या कारणान कार्यकर्त्यांनी बोवाळ घालपाक सुरवात केली आनी उपरांत पुलिसांनी तांकां ताब्यात घेतले.
बोगस मतदारां विशींची जाप विचारपा खातीर गोंय पद्रेश काँग्रेसीच्या पदाधिकाऱ्यांनी काँग्रेस हावस ते आल्तिन मुखेल निर्वाचन अधिकाऱ्यांचे कचेरे मेरन मोर्चो काडपाक सुरवात केली. पूण पुलिसांनी तांचो मोर्चा काँग्रेस हावसा मेरेन आडावन दवरलो आनी तांचे प्रश्नाचे निवारण वेंचणूक अधिकारी करतले अशी जाप दिली.
आमकां मुखेल निर्वाचन अधिकाऱ्यांक निवदेन दिवपाक जाय वेंचणूक अधिकाऱ्यांक न्हय. जर आमकां तांचे कचेरेत धाडीनात जाल्यार, मुखेल निर्वाचन अधिकारी संजय गोयल हांणी मोर्चा मुखार येवन स्पश्टीकरण दिवपाची मागणी करत बोवाळ घालो.
गोंयांत दोन म्हयने जाले मुखेल निर्वाचन अधिकाऱ्यांचे पद रिते दवरिल्ले. पूण राती काँग्रेस मोर्चा काडटा हे कळटकच भारतीय वेंचणूक आयोगान रातीं भितर गोयल हांची मुखेल निर्वाचन अधिकारी म्हूण नेमणूक केली, असो दावो काँग्रेसीचे गोंय प्रदेशाध्यक्ष अमित पाटकार हांणी केलो.

राहूल गांधी हांणी भारतीय वेंचणूक आयोगाक उक्ताडार हाडले उपरांत आयोगान हे विशीं स्पश्टीकरण दिवपाक जाय आशिल्ले. पूण आयोगाचे जाग्यार भाजप स्पश्टीकरण दिता. वेंचणूक आयोग हे भाजपाचो एजंट जालां आनी हो एक व्हडलो मतदार घोटाळो आसा, असो आरोप पाटकार हांणी केलो.
सांगेंच्या गांवांत घर क्र. 0 आशिल्ले घरांत मतदार दाखयतात. घराक क्र. 0 कसो आसपाक शकता. जर तांकां घर क्रमांक ना जाल्यार ते मतदार रस्त्यार रावतात काय हे विचारपाक आमी वताले. वेळ्ळी मतदारसंघात 997 घर क्र. आशिल्ल्या दोन कुडींच्या घरांत वट्ट 28 मतदार आसात आनी आमी चवकशी केले उपरांत थंय फक्त दोनूच मनीस रावतात हे आमकां दिसून आयलां, अशें पाटकार हांणी सांगलें.
भारतीय वेंचणूक आयोग हो सरकाराचो भाग जावन आसा आनी भाजप जे सांगता तें-तें आयोग करता. तशेंच शाखेच्या निर्देशाचेर हे आयोग चलात, असो आरोप विरोधी पक्ष फुडारी युरी आलेमांव हांणी केलो.
जे पद्दतीन दुसऱ्या राज्यांतल्या मतदारांच्या नावांचो आस्पाव गोंयचे वळेरेंत करता तातूंत कसलीच पार्दशकता ना. ही लोकशाहेची हत्या जावन आसा. गोंयांत चडशा मतदारसंघात शुन्य क्रमांक आशिल्ल्या घरांत 20- 30 मतदार वळखपत्रां दिल्यांत. खंयचे पद्दतीन हे बोगस मतदार तयार जाल्यात हेच आमी विचारपाक सोदताले. आयकर, सीबीआय, ईडी उपरांत आता वेंचणूक आयोग सरकाराच्या ताब्यांत आयला. हो एक अघोशित आपातकाल जावन आसा, असो आरोप आलेमांव हांणी केलो.