700 आयआरबी पुलिसांनी केलें प्रशिक्षण पुराय

भांगरभूंय | प्रतिनिधी

लाचित बोर्फुकन पुलीस अकादेमींत जाली पासिंग आउट परेड 

पणजीः आसामांतल्या देरगांवातल्या लाचित बोर्फुकन पुलीस अकादेमींत 700 भारतीय राखीव (आयआरबी) पुलीस दळाच्या हवालदार भरती उमेदवारांनी एक वर्साचें प्रशिक्षण येसस्वीपणान पुराय केलें. आयज जाल्ले पासिंग आउट परेडांत मुख्यमंत्री डॉ. प्रमोद सावंत, आसामाचे मुख्यमंत्री हिमंत बिस्वा सरमा आनी गोंयचे पुलीस महासंचालक आलोक कुमार हाजीर आशिल्ले.
मुख्यमंत्री सावंत हांणी सांगलें, आपल्या उलोवपांत नव्या जवानांची शिस्त, समर्पण आनी कश्टाची तोखणाय करून प्रामाणीकपण आनी लोकसेवेचे उंचेले पांवडे सदांच पाळचे असो उलो मारलो. हे नवे प्रशिक्षीत जवान आतां गोंय पुलीस सेवेंत येतले आनी राज्याची कायद्याची अंमलबजावणीचे बळगें वाडयतले.

569 दादले आनी 131 बायलां मेळून वट्ट 700 आयआरबी भरती जवानांनी शारिरीक फिटनेस, मानसीक क्षमताय, फील्ड टॅक्टिक्स, कायदो आनी सुवेवस्था वेवस्थापन आनी शस्त्रां हाताळप ह्या विशयांचेर वर्सभर प्रशिक्षण पुराय केलें.
4 ऑक्टोबर 2024 दिसा खासा रेल्वेंतल्यान हे जवान देरगांव प्रशिक्षणा खातीर गेल्ले. हातूंत आसाम, मणिपूर आनी गोंय पुलीस दळांतल्या जवानांचो आस्पाव आशिल्लो.
पासिंग आउट परेडांत शिस्तबद्ध संचलन, सोपूत सुवाळो, इनामां वांटप आनी ‘पँथर्स ऑन व्हील्स’ ह्या खाशेल्या पंगडाचें प्रदर्शन आशिल्लें. दोनूय राज्यांतल्या वरिश्ठ पुलीस अधिकाऱ्यांनी ह्या परेडाचे निरिक्षण केले.

गोंय पुलीसांक उत्कृश्ट आनी उच्च दर्जाचें प्रशिक्षण दिवपा खातीर आसाम सरकार आनी लाचित बोर्फुकन पुलीस अकादेमीचे मुख्यमंत्री डॉ. प्रमोद सावंत हांणी उपकार मानले. प्रशिक्षणाच्या वेळार भरती जाल्ल्या लोकां कडेन सतत संपर्कांत आशिल्लो आनी सदांच सकारात्मक प्रतिसाद मेळटालो अशें तांणी सांगलें. आमचे अधिकारी दुसऱ्या राज्यांत प्रशिक्षण घेवन नवे कुशळटाय सयत परत येतात तेन्ना ती अभिमानाची गजाल आसता अशेंय मुख्यमंत्र्यान सांगलें. ह्या उपक्रमाक लागून गोंय आनी आसाम हांचे मदले भावपणाचे संबंद आनीक घट जाल्यात अशेंय तांणी म्हणलें.