भांगरभूंय | प्रतिनिधी
‘गुटा’च्या पदाधिकार्यांचें राजकी पक्षांक आव्हान
पणजीः गोंय विद्यापीठाचे रँकींग विशीं जे आरोप भायल्या राज्यांचे प्राध्यापकांचेर जाल्यात हे विशीं आमी राजकी पक्षां कडल्यान स्पश्टीकरण मागयलां. तशेंच खाजगी विद्यापीठ हाडटना ताचो परिणाम गोंय विद्यापीठाचेर जावचो न्हय, अशी मागणी गोंय विद्यापीठ शिक्षण संघटणेन (गुटा) केल्या.
गुटाच्या पदाधिकार्यांनी गोंय विद्यापीठाच्या कॅम्पसांत हे विशीं आपयल्ले पत्रकार परिशदेंत गोंय विद्यापीठा विशीं साबार विशय मांडले.
हे विशीं उलयतना ‘गुटा’चे अध्यक्ष रामराव वाघ हांणी सांगलें, राबितो दाखलो सक्तीचें आशिल्ल्यान गोंयच्या शिक्षकांची भरती जावन गोंय विद्यापीठाचो दर्जो देवता अशें विधान कुलगूरू हरीलाल मेनन हांणी केल्लें. ह्या विधाना उपरांत गोंय विद्यापीठाक नॅक ए प्लस मान्यताय मेळ्ळी.
हे विशीं आमी मेनन हांचेकडे स्पश्टीकरण मागलें. तांणी सांगलें, वरीश्ठ प्राध्यापक निवृत्त जावपाचे वाटेर आसात आनी तांच्या जाग्यार नवे शिक्षक भरती जाल्यात. मात कांय निकशांक लागून ह्या नव्या शिक्षकांक बढती दिवपाक कळाव जातलो. देखून राबीतो दाखलो अट सदळ करून भायल्यान शिक्षक हाडपाचो आपलो विचार आसलो, अशें मेनन हांणी सांगलें.
आमी मेनन हांकां सांगलें, राबितो दाखलो अट ही सरकारान सक्तीची केल्या देखून ती सदळ करून दुसरो पर्याय सोदप हें शक्य ना अशें सागूंन आमी निशेध केलो. मात मेनन हांच्या विधानाचेर राजकी पक्षांनी भरपूर बोवाळ घातलो. गोंय विद्यापीठाचें रँकींग वाडोवपा खातीर गोंयचे तशेंच भायले वरीश्ठ प्राध्यापकांनी खूब मेहनत घेतल्या. मात भायल्या राज्यांतल्या शिक्षकां कडेन कसलेंच संसोधन ना असो आरोप कांय राजकी पक्षांनी केला, अशें वाघ हांणी म्हणलें.
ह्या राजकी पक्षांनी केल्ल्या आरोपां खातीर राज्या भायले वरीश्ठ प्राध्यापक आनी गोंयच्या प्राध्यापकांची स्वाभिमान दुखावला. आमी ह्या आरोपांचो निशेध करून ते सिद्ध करून दाखोवचे असो उलो आमी राजकी पक्षाक मारला, अशें वाघ हांणी म्हणलें.
तशेंच सरकारान खाजगी विद्यापीठ उबारपाचो प्रस्ताव चलयला. आमचो खाजगी विद्यापीठा आड कसलोच विरोध ना. मात तांचो परिणाम गोंय विद्यापीठाचेर जावचो ना हें सरकारान मतींत दवरचें, अशें वाघ हांणी मागलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
