भांगरभूंय | प्रतिनिधी
कोमुनिदाद वांगड्यांची १४ तारखेर पणजेंत बसका
पणजी : कोमुनिदाद जमनींतलीं अनधीकृत घरां वा बांदकामां अधीकृत करपाक राज्यांतल्या कोमुनिदादींचो खर विरोध आसा. सरकारान संमत केल्ल्या विधेयकाचेर फुडली कृती थारावपा खातीर कोमुनिदादींची १४ ऑगस्टाक पणजेंत बसका जातली. कोमुनिदाद वांगड्यांचे विचार आयकून घेवन फुडली कृती थारायतले, अशी म्हायती सुकूर कोमुनीदादचे ऍटर्नी जुआंव मिनेझीस हांणी दिली.
राज्यांत १२० वेर कोमुनिदादी आसा. कोमुनिदादीच्यो बसका जायत आसा. जमनी विशीं सरकार निर्णय घेवपाक शकना. जाणी कोणी जमनी बळकावन बांदकामां केल्यांत तीं मोडपाक जाय. सरसकट सगलीं घरां अधीकृत करपाचो निर्णय अयोग्य आसा.
गोंयांत जश्यो कोमुनिदाद जमनी आसात तश्यो हिमाचल प्रदेशांत कम्युनीटी जमनी आसात. ह्या जमनींविशीं हिमाचल प्रदेश सरकारान लेगीत असोच कायदो केल्लो. हो कायदो हिमाचल प्रदेश उच्च न्यायालयान अवैध थारायलो. मुंबय उच्च न्यायालयान लेगीत कोमुनिदाद जमनींतलीं बेकायदो बांदकामां मोडपाचे आदेश दिल्यात. कोमुनिदादीच्यो जमनी ह्यो सरकारच्यो जमनी न्हय. हाका लागून ह्या जमनीं विशीं कसलोच कायदो सरकार करपाक शकना. कोमुनिदाद कायदो तशेंच संमत जाल्ल्या विधेयकाचो अभ्यास करून आमी फुडली कृती थारायतले, अशें मिनेझीस हांणी सांगलें.
आयतारा करबोली कोमुनिदादीन विरोध केल्या उपरांत एकठांय येवन कृती थारावपाचो निर्णय जाला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
