भांगरभूंय | प्रतिनिधी
काँग्रेस आमदारांचो दावो : गोंयांतूय मतदार नोंदणींत गैरप्रकार जाल्ल्याचो दुबाव
भांगरभूंय । प्रतिनिधी
पणजी : बंगळुरूच्या महादेवपुरा मतदारसंघांत जे तरेन मतदार नोंदणींत गैरप्रकार जाला तसोच गोंयांत लेगीत जाला. एकाच घरांत 80 परस चड मतदारांची नोंदणी जाल्या. काँग्रेस पक्ष अभ्यास करून हो प्रकार उक्तडार हाडटलो, अशें काँग्रेस प्रदेशाध्यक्ष अमीत पाटकार हांणी सांगलें.
पाटकार हांणी काँग्रेस हावसांत पत्रकार परिशद घेतिल्ली. ह्या वेळार उत्तर गोंय अध्यक्ष विरेंद्र शिरोडकार, दक्षीण गोंय अध्यक्ष सावियो डिसिल्वा, नितीन चोपडेंकार हाजीर आशिल्ले.
15 दीस चलिल्ल्या पावसाळी अधिवेशनांत काँग्रेसीच्या तिनूय आमदारांनी बरी कामगिरी करतना सरकाराचो गैरवेव्हार उक्तडार हाडलो. तारांकीत आनी अतारांकीत मेळून काँग्रेस आमदारांनी 810 प्रस्न विचारिल्ले. ह्या सगल्या प्रस्नांच्यो जापो काँग्रेसी कडेन आसा. विरोधी पक्ष फुडारी युरी आलेमांव, एल्टन डिकॉस्टा आनी अॅड. कार्लोस फेरेरा हांणी प्रस्न जापेच्या सत्रा सयत चर्चे वेळार गोंयचे प्रस्न ताकदीन मांडले, अशें पाटकार हांणी सांगलें.
प्रस्न जापेच्या सत्राक काँग्रेस आमदारांचे चडशे प्रस्न चर्चेक आयले नात. तरी लेगीत सरकाराचो गैरवेव्हार उक्तडार हाडपाक काँग्रेस आमदारांक येस आयलें. लोकांनी लेगीत काँग्रेस आमदारांच्या विधानसभेंतले कामगिरीची तोखणाय केली. लोकांनी मांडिल्ल्यो समस्या प्रस्नाच्या रुपांत आमदारांनी सभाघरांत मांडल्यो. इबाडिल्ली कायदो सुवेवस्था, बेकायदो जमीन रुपांतरण, नुस्तेमारी खात्यांत नोकर भरतींतलो गैरवेव्हार, 4500 कोटीं वयर थकीत ग्रीन सेस, भूनकासो गैरवेव्हार सभाघरांत काँग्रेस आमदारांनी उक्तडार हाडलो, अशें पाटकार हांणी सांगलें.
कोमुनिदाद जमिनींतलीं घरां अधिकृत करपाचें विधेयक हो कोमुनिदादीच्यो जमनी हडप करपाचो यत्न आसा. हाचे पयलीं मंत्र्यांनी कोमुनिदादीच्यो जमनी हडप करपाचे प्रकार घडल्यात. हो गैरवेव्हार काँग्रेस उक्तडार हाडटलो, अशें पाटकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
