भांगरभूंय | प्रतिनिधी
मोरजी विठ्ठलदासवाड्या वयल्या वेवसायिकाचें काम
भांगरभूंय । प्रतिनिधी
पेडणें : मोरजी पंचायत वाठारांतल्या विठ्ठलदासवाडो दर्यादेग वाठारांत सीआरझॅड नेम मोडून चार माळ्यांचें हॉटेल बांदलां. ताचें घाणयारें उदक परंपरीक व्हाळा वरवीं दर्यांत सोडपाचो प्रकार चालू आसा. तेच वांगडा पोतयांनी भरिल्लो कोयर लेगीत ह्या व्हाळांत उडयला. हे संबंदांत भलायकी खातें आनी प्रदुशण मंडळान थंय भेट दिवन जे कोण हॉटेल वेवसायीक अशे गैरप्रकार करतात, तांचेर खर कारवाय करची अशी मागणी मोरजीचे थलावे पंच तशेंच सरपंच पवन मोरजे हांणी मागणी केल्या.
विठ्ठलदासवाडो दर्यादेग वाठारांत व्हड प्रमाणार बिगर गोंयकारांनी जमनी विकत घेवन, सीआरझॅड नेम मोडून दोन-चार माळ्यांचीं हॉटेलां बांदल्यांत. तांणी घाणयाऱ्या उदकाचो योग्य विलो लावचे खातीर कसलीच वेवस्था करूंक ना. ते आपल्या हॉटेलांतलें घाणयारें उदक थेट दर्यांत सोडटात.
सरपंच मोरजे हांणी घडणुकेचे सुवातेर वचून पळोवणी केली आनी खर उतरांनी नाराजी उक्तायली. बेकायदो उबारिल्लें हॉटेल मोडपाची नोटीस आदींच पंचायतीन संबंदिताक दिल्ली. पूण पंचायत संचालकान ताका स्थगिती दिली. आतां प्रदुशण मंडळान ह्या हॉटेलाची तपासणी करून तांकां परवानगी कशी दिली, हाची म्हायती लोकांक दिवची. भलायकी खात्यानूय हाचे कडेन लक्ष दिवपाची गरज आसा, अशें सरपंच मोरजे हांणी सांगलें. पंचायतीन कारवाय करचे खातीर पावलां उखल्ली जाल्यार वरिश्ठां कडल्यान चेपण तंत्राचो वापर करतात, अशी खंत सरपंच मोरजे हांणी उक्तयली. आतां प्रदुशण नियंत्रण मंडळान स्वता हे सुवातेर येवन पळोवणी करून हॉटेलाचेर कारवाय करची, अशी तांणी मागणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
