भांगरभूंय | प्रतिनिधी
मॉवीन गुदिन्हो : वाडे दर्यादेगेर सुविधा दिवपाचें उतर
भांगरभूंय । प्रतिनिधी
वास्को : ल्हान व्हडेंकारांचें हीत सांबाळपाक आपलो सदांच आदार आसतलो. वाडे वाठारांत ल्हान व्हडेंकार आनी भाटकार हांचे मदीं गैरसमज निर्माण जाल्लो, तो आतां पयस जाला. वाडे दर्यादेगेर हेर सुविधा उपलब्ध करतले, जे वरवीं ल्हान व्हडेंकारांच्यो समस्या पयस जातल्योच, ते भायर ते दर्यादेगेचो वापर थळाव्यांक लेगीत करपाक मेळटलो, अशें उतर पंचायत मंत्री मॉवीन गुदिन्हो हांणी वाडे फिशींग कॅनू असोसिएशनाक दिलें.
वाडे दर्यादेगेर नुस्तेमारी करपी ल्हान व्हडेंकारांनी एकठांय येवन वाडे फिशींग कॅनू असोसिएशनाची स्थापना केली. संघटणेच्या पदाधिकाऱ्यांनी आनी वांगड्यांनी मंत्री गुदिन्हो हांची भेट घेवन तांणी दिल्ल्या आदारा खातीर तांचे उपकार मानले.
ल्हान व्हडेंकारांनी एकठांय येवन संघटणा स्थापन केल्ल्यान तांकां ताचो फुडारांत लाव जातलो. वाडे दर्यादेगेर कांय भायले फिशींग ट्रॉलर्स आनी नुस्तेमारी व्हडें वरवीं नुस्तेमारी करताले, ते आतां बंद जातले. थंय वाडे फिशींग कॅनू असोसिएशनाच्या व्हडेंकारांक प्राधान्य दितले. हे दर्यादेगेर कांय जाण गैरप्रकार करताले, ताका लागून नुस्तेमार भावांक त्रास सोंसचो पडटालो. आतां थंय आनीक एक हायमास्ट उबारतले, जाका लागून थंयच्या गैरप्रकारांक आळाबंद येतलो. तेचवरी दर्यादेग नितळ करतले. ताका लागून थळाव्यांक ते दर्यादेगेचो वापर करपाक मेळटलो, अशें मंत्रा गुदिन्हो हांणी सांगलें. संघटणेचे अध्यक्ष रेमी कुतिन्हो हांणी मंत्री गुदिन्हो हांचे उपकार मानतना सांगलें, मंत्री गुदिन्हो हांकां लागून वाडे दर्यादेगे वयल्यो समस्यो सुटाव्यो जाल्यो. क्रांती कुटवालकार हांणी सांगले, मंत्री गुदिन्हो आनी सरकारा कडल्यान सदांच योग्य आदार आनी मजत मेळटली, अशी आस्त आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
