भांगरभूंय | प्रतिनिधी
तपासणी करपाची सरपंच डिक्सन वाझ हांची मागणी
मडगांव : फाटल्या वर्सा ह्याच दिसांनी कुटबणां कॉलराचे धामीक लागून कांय कामगारांक मरण आयलें. तेन्ना गरजेचे उपाय केले. आतां परत एक फावट कॉलराचे दुयेंती मेळ्ळ्यात. हाका लागून मोबोर केळशीच्या जेटीर उदकाची, शौचालयांची वेवस्था करची तशेंच भलायकी खात्यान कामगारांचे भलायकेची तपासणी करची, अशी मागणी सरपंच डिक्सन वाझ हांणी केल्या.
नुस्तेंमारीचो नवो हंगाम सुरु जाले उपरांत कांय दिसांनीच काॅलेराचो भंय निर्माण जाला. पोरूं कुटबणां हांगा कॉलराचे साथीन कामगारांक मरण आयिल्लें. आतां नव्या हंगामांत परत एक फावट ओडिशाच्यान आयिल्ल्या कामगारांचे भलायकी तपासणी वेळार मोडशेचे स दुयेंती सांपडले. तांतल्या एकल्याचेर जीएमसींत उपचार सुरू आसात. हेच फाटभूंयेर केळशी जेटीचेरूय कामगारांचे भलायकेचो सुरक्षिततायेचो प्रस्न निर्माण जावचो भंय आसा.
हे विशीं सरपंच डिक्सन वाझ हांणी सांगलें, केळशीचे जेटीर नुस्तें चडोवप वा देंवोवपाक बंदी आसा. मात, अशें आसून कांय फावटीं अशे प्रकार आसतात. नुस्तें खात्यान हाचेर नियंत्रण हाडपाची गरज आसा. हांगचो वेवसाय गोंयकारांचो आशिल्ल्यान तो बंद करपाची मागणी करचे ना. मात नेम पाळून कामगारांचे भलायकेची काळजी घेवन वेवसाय करपाची गरज आसा. ना जाल्यार डेंग्यू, मलेरिया, कॉलरा सारकिल्ले रोग पातळ्ळ्यार थळाव्यांक हाचे त्रास सोंसचे पडटले. पर्यटनाचेरूय फटको बसतलो.
ह्यान पयलीं ४ ऑगस्टाक पंचायतींतल्यान जेटीची पळोवणी करीत बोट धनयांक योग्य ती जतनाय घेवपाची आनी नितळसाण राखपाचे निर्देश दिल्ले. पंचायतीन उदकाची तपासणी, सुरक्षारक्षकाची नेमणूक आनी हेर गरजेचे उपाय केल्यात. भलायकी तपासणे उपरांतूच आतां दुयेंती मेळ्ळ्यात. हांगा येवपी कामगारांचीय भलायकी तपासणी भलायकी खात्यान करपाची गरज आसा. नुस्तें खात्यान गरजेचे उपाय मोबोर जेटी करचे. तशेंच बोट धनयांनीय कामगारांच्या भलायकेचे सुरक्षितताये खातीर काळजी घेवची, अशी मागणी डिक्सन वाझ हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
