भांगरभूंय | प्रतिनिधी
पेडणें : शेतकारांक शिकोवपाची गरज ना. ते शेतकारी अणभवान शेती करतात. तांकां जर योग्य पद्धतीन मार्गदर्शन मेळ्ळें, जाल्यार शेती वरवीं ते अदीक उत्पन्न घेवपाक शकतात, अशें पेडणें शेतकी विभागाचे अधिकारी रणजीत म्हापसेकार हांणी सांगलें.
चिवयवाडो, विर्नोडच्या रविकांत नायक आनी श्रेया रविकांत नायक ह्या जोडप्यान शेतांत विवीध प्रयोग केले. तांची पळोवणी करपा खातीर आनी तांकां मार्गदर्शन दिवपाक शेतकी अधिकार्यांचो पंगड शेतांत पाविल्लो. तेन्ना थळाव्या पत्रकारां कडेन अधिकारी रणजीत म्हापसेकार उलयले. ह्या वेळार अधिकारी शुभम सातार्डेकार, अधिकारी सागर नानोस्कार, सुरज नानजी उमा प्रभुदेसाय हे शेतकी अधिकारी, शेतकार तिळवे हाजिर आशिल्ले.
म्हापसेकार हांणी सांगलें, ह्या हंगामांत शेवणीं उत्पन्न खातात, तांचेर नियंत्रण मेळोवपाक मेळटलें अशें खातीर अँटीबट नेट लावपाची गरज आसा. हाका लागून सरकार २५ रुपया पर चौरस मिटर सुवाते खातीर अनुदान दित आसता. खंयचोय शेतकार जर कायमस्वरूपी अशे तरेचो प्रकल्प उबारून शेती करता जाल्यार सरकार अनुदान दीत आसता. रोजांच्या फुलांकुय सरकार अनुदान दीत आसता.
रानवटी जनावरांचो वावर
रानां नश्ट जाल्ल्यान रानवटी जनावरांचो मोर्चो बागायती शेती कडेन वळून हीं जनावरां लुकसाण करीत आसतात. अशा वेळार हें सरकार ह्या जनावरांचो बंदोबस्त करपाक सरयांचो आडो घालपाक अनुदान दीत आसता. आत्मा टीम वरवीं सरकाराच्या येवजण्यांची जनजागृती शेतकारांक दितात, अशें म्हापशेकार हांणी म्हणलें.
सरकार शेतकारांक पालेभाजयो फळांची लागवड करपा खातीर वेगवेगळे तरेन अनुदान दीत आसता. हाचो लाव शेतकारांनी घेवन आपापली शेती करची, असोय उलो तांणी मारलो.
रविकांत नायक आनी श्रेया नायक ह्या जोडप्यान २००० झाडांची लागवड केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
