भांगरभूंय | प्रतिनिधी
पणजी : फाटल्या कांय दिसां सावन उदक सांठिल्ल्या सुवतांचेर जायत्या जाणांक बुडून मरण आयलां. हो आंकडो दर वर्सा वाडतूच आसा. अश्या घडणुकांचे फाटभूंयेर गोंय सरकारान धोको निर्माण करपी उदक सांठपी सुवातांक चड सुरक्षीत करपा खातीर खर पावलां उबारल्यांत. वापरी नाशिल्ले खाणींचीं फोंडकुलां, चिरे खाणी, तळीं, कानाल आनी घसघशे अश्या सुवातांचेर अपघात जावचे न्हय म्हूण विशेश उपाय केल्यात, महसूल मंत्री बाबुश मोन्सेरात हांणी हे विशीं विधानसभेंत म्हायती दिल्ली.
तशेंच दक्षीण गोंय जिल्लोधिकार्यांनी भारतीय नागरीक सुरक्षा संहिता २०२३ च्या कलम १६३ खाला आदेश काडून अशा असुरक्षीत सुवातांचेर पेंवप, न्हांवप हाचेर बंदी घातल्या. खाणींचेर देखरेख दवरपाक विशेश समिती स्थापन केल्या, पंचायत आनी पालिकांचे मजतीन शाळा आनी गांवांत जनजागृती मोहिमो राबयतात, अशें मंत्री मोन्सेरात हांणी सांगलें.
राज्य सरकारा कडल्यान शेगीत जनतेक तशेंच पर्यटकांक धोको निर्माण करपी सुवातां पसून पयस रावपाचो उलो मारला. तशेंच नेम खरपणान पाळचे खातीर ताची अंमलबजावणीय करता. दक्षीण गोंयांत १६ मदलीं वापरा बगर आशिल्लीं १३ खणींचीं फोंडकुलां काट्यांच्या सरयांचो आडो घालून सुरक्षीत केल्यांत. जाल्यार हेर तीन कडेन काम चालू आसा.
उत्तर गोंयांतूय दिवचल, सत्तरी आनी पेडणेंच्या चार चिरे खाणीं कडेन कांटयार्यां आड्याचें काम पुराय जालां. आनीक दोन सुवातां खातीर सुरक्षा उपाय येवजण मंजूर केल्यात. सरकाराच्या ह्या उपायांक लागून राज्यांतल्यो बुडपाच्यो घडणुको कांय प्रमाणांत उण्यो जातल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
