भांगरभूंय | प्रतिनिधी
शिक्षण मंत्रालयाच्या एका सर्वेक्षणांत भारतांतल्या विद्यार्थ्यांमदीं गणीत शिक्षणाची सद्याची स्थिती चकाचक उक्ती जाल्या. शिक्षण मंत्रालयाच्या परख राष्ट्रीय सर्वेक्षण, (जाका पयलीं राष्ट्रीय उपलब्धी सर्वेक्षण म्हणटाले) तातूंत यत्ता णववेंतले 63% विद्यार्थी सादे संख्यात्मक नमुने वळखूंक शकना अशें म्हणिल्लें. इतलेंच कित्याक, अपूर्णांक आनी पूर्णांक हे सारक्यो मुळाव्यो संकल्पना आऩी हेर संख्यात्मक गजाली तांकां कळनात ही गजाल वाऱ्यार पडली. णववेक पाविल्ल्या विद्यार्थ्याक जर ही गजाल कळना जाल्यार ताच्या फुडाऱाच्या नदरेन ही परिस्थिती हुस्क्याची.
गणीत पाठ्यक्रम, गणीत अध्यापन हांचेर तज्ञांनी फेरविचार करपाची गरज उप्रासल्या अशें दिसता. एका तेंपार असले सर्वे बी कांयच जाय नाशिल्ले. आतां डिजिटल युगांत पद्दतशीरपणान हे सर्वे जातात. तातूंत शिक्षकांचो पांवडो आनी विद्यार्थ्यांचो पांवडो पारदर्शकपणान दिश्टी पडटात.
नव्या देशव्यापी सर्वेक्षणा प्रमाण, यत्ता सवेंतलीं भारतांतलीं 43% शालेय भुरगीं पुस्तकांतले मुखेल विशय आनी संकल्पना समजूंक शकनात. शिक्षण मंत्रालयाच्या सर्वेक्षणांतल्यान अशें अनुमान काडलां की सवेंतल्या फक्त 53% विद्यार्थ्यांक 10 मेरेनचे पाढे येतात. बारावी मेरेन कॅलकुलेटर वापरपाक मेकळीक नाशिल्ल्यान एक वेगळो प्रस्न आसा. प्रगत देशांनी सातवी आठवी सावन कॅलकुलेटर वापरपाक दितात. आल्जेब्रांतले फॅक्टर सोडयतना पाढ्यांचो उपेग जाता. देख दितां. 48. हाचे फॅक्टर पाढे पाठ आशिल्ल्याक सेकंदा भितर दिसतात. 12 x 4, 6 x 8, 16 x 3, 24 x 2. अश्यो कितल्योय देखी दिवं येता. गणित विशयांत आवडीन स्पेशलायज करतकच आनी तीन वर्सां हायस्कूलांत गणीत शिकयतकच म्हाका इतलेंच जाणवता की पाढे 2 ते 20 मेरेन जायच.
समग्र विकासा खातीर ज्ञानाचो नियाळ आनी विश्लेषण (परख) राष्ट्रीय सर्वेक्षण 4 डिसेंबर 2024 रोजी जालें. तातूंत राज्यां आनी केंद्रशासीत प्रदेशांतल्या 74,229 शाळांतल्या सरकारी आनी खाजगी शाळांतल्या यत्ता 3, 6 आनी 9 हातूंतल्या 21,15,022 विद्यार्थ्यांची मोलावणी केली. हाचे वेल्यान ह्या सर्वेचो आंवाठ दिसून येता.
सर्वेक्षणा प्रमाण, तिसरे यत्तेंतल्या 1,15,022 विद्यार्थ्यांची तपासणी केली. जातूंत 2,70,424 शिक्षक आनी शाळा मुखेल्यांनी प्रस्नावळ घेवन ताचेर जापो बरयल्यो.
तिसरेंत, फक्त 55% विद्यार्थी 99 मेरेनचे आंकडे चडपी वा देंवपी क्रमान मांडूंक शकतात. जाल्यार 58% दोन-अंकी संख्यांची बेरीज आनी वजाबाकी करूंक शकतात. सवेंतल्या 53% विद्यार्थ्यांक 10 मेरेनची बेरीज आनी गुणाकार रचना खबर आसा. ते अंकगणीत क्रिया समजूंक शकतात अशेंय सर्वेंत दिसून आयलें.
गोंयांत धावेक दोन पातळेचे पेपर आसात. सोपो आनी कठीण. आपणाक जाय तो घेवपाचो. आमच्या देशांत आनीक खंयच बोर्डाचे पेपर अशे लेवल एक आनी लेवल 2 जाय तो घेयात ही निवड दिवन नात. हांगा पातळी कसली आनी कित्याक तेंच कळना.
मुदलांतूच गणीत हो विशय हावको जाला. भुरग्यांक गणीताचो भंय दिसता. तातूंत जर भेदभाव करीत जाल्यार भुरग्याचें लुकसाण तरांतरांनी जावं येता.
सर्वेक्षणांत आनीक कितें मुखार आयलां तें पळोवया. सवेच्या गणीतांत विद्यार्थ्यांनी सगल्यांत कमी (46%) गूण मेळयले, जाल्यार भाशा विशयांत सरासरी 57% मेळयले.
गणीत शिक्षणांतल्यो तफावती विद्यार्थ्यांचीं कौशल्यां घट करपा खातीर, शिक्षण धोरणांत सुदारणा करपा खातीर आनी आलायतो शिक्षण आदार दिवपा खातीर केंद्र पांवड्यार हस्तक्षेपांची गरज उक्तायतात. या मळांक प्रभावीपणान घटाय हाडल्यार देशांतल्या एकूण विद्यार्थ्यांच्या शिक्षणाचे निकाल सुदारपाक मदत जातली, अशें अहवालांत मुखार म्हळां.
केंद्रीय सरकारी शाळांनी यत्ता तिसरेंत गणितांत सगल्यांत कमी कामगिरी नोंद केली. सरकारी अनुदानित आनी राज्य सरकारी शाळांनी यत्ता सवेंत, खास करून गणितांत दुबळी कामगिरी दाखयली.
ग्रामीण-शारी तफावत दिसून आयली, ग्रामीण भागांतल्या तिसरेंतल्या विद्यार्थ्यांनी गणीत आनी भाशा हातूंत बरी कामगिरी केली. हाचे उरफाटें, यत्ता सवी आनी णववेंतल्या शारी भुरग्यांनी सगल्या विषयांत तांच्या ग्रामीण समकक्षां परस बरें यश मेळयलें.
शालेय शिक्षण सचिवांनी पद्धतशीर कृतीची गरज आतां उकतायल्या. सर्वेक्षणाचे निश्कर्श अर्थपूर्ण कृतींत रूपांतरित करपा खातीर एक व्यापक भोव पांवड्यांचें धोरण मुखार हाडटले अशें तांणी सांगलें.
“हातूंत राष्ट्रीय, प्रादेशिक, राज्य आनी जिल्हे पांवड्यार कार्यशाळां वरवीं डेटाचो पांवड्या पांवड्या प्रसार करपाचें आस्पावीत आसा. ह्यो कार्यशाळा फकत सर्वेक्षणाचे निकाल समजून घेवपाचेरूच न्हय तर जिल्हे-खाशेले रोडमॅप तयार करपाचेरूय लक्ष केंद्रित करतले, जंय भूमिका आनी जबाबदाऱ्यो परिभाषित केल्यात,” अशें तांणी मुखार सांगलें.
दर तीन वर्सांनी, परख सर्वेक्षण तिसरी, पाचवी आनी आठवी यत्तेच्या विद्यार्थ्यांनी विकसीत केल्ल्या क्षमतांचें विश्लेशण करता. ते प्रमाण फुडल्या शिक्षणाचें नियोजन करप सोपें जाता. गोंयच्या शिक्षकां खातीर पोरूं बंगळूराक प्रशिक्षण जाल्लें. तेन्ना शिक्षकांच्या प्रशिक्षणपूर्व चांचणेंत अजाप करपा सारके निकाल दिसून आयले. कांय जाणांक 4 टक्के मार्क पडिल्ले. गणिताची बुन्याद घटमूट दवरपा खातीर शिक्षकांना पयलीं वेळोवेळ प्रशिक्षण जाय. कारण गणीत ही सगळ्या विज्ञान फांट्यांची बुन्याद. इंजिनियरींग फांट्यांचीय बुन्याद. गणीत विशयांत पदवी घेतिल्लो शिक्षक गणीत अध्यापक म्हणून चड न्याय दिवंक शकता. बायॉलॉजी आनी केमिस्ट्री विशयांत पदवी घेतिल्लो न्हय. आतां नव्या सर्वेक्षणा प्रमाण मुखावेलीं पावलां कशीं उखलचीं त्यो सुचोवण्यो मंत्रालया कडल्यान येतल्योच.
भुरग्यांक गणिता कडेन आकर्शीत करपा खातीर आनी गोडी लागची हे खातीर वेगवेगळ्या तरेन यत्न जावंक जाय. तातूंत सातत्य आसूंक जाय. गणीत कुवाड्यांचो खेळ आसचो. आज डिजिटल तंत्रगिन्यान आसा. स्मार्ट बोर्ड आसा. खूब कितें करूं येता. बरे तरेन सादरीकरण करून भुरग्यांक गणीत कितलें रंजक आसा तें दाखोवं येता. तांकां गणितीय नदर दिवं येता. गणीत विद्यार्थ्यांचें बरें जावचें हीच इत्सा.
मुकेश थळी
फोंडें
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
