भांगरभूंय | प्रतिनिधी
पंचायतीं खातीर ‘नियमीत गोंय’ एआय प्रणाली सुरू
फुडल्या कांय म्हयन्यांत सगल्या सरकारी कार्यालयांनी
वेळार कामाक येनाशिल्ल्या कर्मचाऱ्यांक जातली अडचण
भांगरभूंय । प्रतिनिधी
दिवचल : ‘डिजीटल गोवा’ मोहिमे खाला राज्य सरकारान सगल्या पंचायत कर्मचाऱ्यां खातीर फेशियल रेकग्निशन अटेंडन्स मॅनेजमेंट प्रणाली (नियमीत गोंय) हालींच अधिकृतपणान सुरू केली. ही प्रणाली एआयचेर चलतली. कर्मचाऱ्यां मदीं पारदर्शकताय, कार्यक्षमता आनी डिजीटल प्रशासन वाडोवपा खातीर नेटान पावलां उखलीत आसा. वेळार कामाक येनाशिल्ल्या कर्मचाऱ्यांक हे प्रणालीक लागून अडचण जातली. ही प्रणाली फुडल्या कांय म्हयन्यांत सगल्या सरकारी कार्यालयांनी लागू जावपाची आसा.
पणजे जाल्ल्या सुवाळ्यांत मुख्यमंत्री डॉ. प्रमोद सावंत हांणी ह्या नियमीत गोंय पद्दतीचें उक्तावण केलें. ह्या वेळार पंचायत मंत्री मॉवीन गुदिन्हो, पर्यटन मंत्री रोहन खंवटे, नुस्तेमारी मंत्री नीळकंठ हळर्णकार, समाजकल्याण मंत्री सुभाष फळदेसाय हाजीर आशिल्ले.
मुख्यमंत्री डॉ. सावंत हांणी सांगलें, ही प्रणाली सुरवातेक पंचायतींक टप्प्याटप्प्यान लागू जातली. मागीर ती गोंय सरकारच्या दरेका कार्यालयांनी चालीक लायतले. ताका लागून फक्त त्या कार्यालयांतलें भितरलें काम सुदारतलें अशें न्हय, जाल्यार हेर विभागां खातीरूय ती आनी हेर एआय प्रणाली लागू करपाक एक आदर्श म्हूण मुखार येतली. कामचुकार कर्मचाऱ्यांक ह्या प्रणाली खातीर वचक बसतलो.
हें अॅप आरएनआयटी एआय सोल्युशन्स लिमिटेडा वतीन चालीक लायतात. प्रकल्पाचे अधिकारी एस एस कृष्णा आनी हेर प्रतिनिधी ह्या उक्तावण सुवाळ्याक हाजीर आशिल्ले.
कृष्णा हांणी सांगलें, ही प्रणाली सदांच हातान करपाची सय आनी हाताचें बोट लावपाचे प्रणाली परस पंचायत कर्मचाऱ्याच्या मुखामळाची वळख तंत्रज्ञानाचो वापर करून करता. कर्मचाऱ्यांची दिसपट्टी उपस्थिती ह्या नव्या एआय तंत्राक लागून सुदारतली. नेमको वेळ तपासप, निरिक्षण दवरप शक्य जातलें. यंत्राक हात लावपाची गरज पडचीना. उपस्थीत नोंदीचें जिओ- टॅगींक, टायम स्टॅम्पिंग, आनी अहवाला खातीर रियल टायम अशीं जायतीं खाशेलपणान हे प्रणालींत आसात.
कृष्णा हांणी सांगलें, प्रधानमंत्री नरेंद्र मोदी हांणी देशांतल्या विविध वाठारांत हें अॅप उपेगी थारिल्ल्याचें सांगून ताची तुस्त केल्या. उत्तरप्रदेश, तेलंगण, आसामा सयत साबार राज्यांतल्या सरकारांनीय ही प्रणाली उपेगी थारिल्ल्याचें म्हणलां. कामगार, अधिकारी वर्गाची हजेरी आनी हेर गजाली तत्पर दवरपांत हें अॅप उपेगी थारलां. वेळार कामार पाविल्ल्यान आतां पंचायत अधिकारी, कर्मचाऱ्यांची कार्यक्षमता सुदारतली, अशेंय तांणी सांगलें. ह्या वेळार हेर मानेस्तांनीय विचार मांडले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
