भांगरभूंय | प्रतिनिधी
मुख्यमंत्री डॉ. प्रमोद सावंत : मराठी चित्रपट महोत्सवाचें उक्तावण
भांगरभूंय । प्रतिनिधी
पणजी : गोंय मनरिजवण सोसायटी वतीन मराठी आनी कोंकणी चित्रपटांक अर्थीक मजत येवजण आसा. गोंयांतल्या 30 टक्के थळाव्या कलाकारांक घेवन चित्रपट तयार केलो जाल्यार हे येवजणेचो लाव घेवपाक मेळटा, अशें मुख्यमंत्री डॉ. प्रमोद सावंत हांणी सांगलें. व्हिन्सन वर्ल्डच्या 14 व्या मराटी चित्रपट महोत्सवांत ते उलयताले.
गोंया सारक्या ल्हान राज्यांत तीन-तीन चित्रपट महोत्सव जातात. एक आंतरराष्ट्रीय चित्रपट महोत्सव आनी दुसरो गोवा चित्रपट महोत्सव जाल्यार तिसरो व्हिन्सन वर्ल्डाचो मराठी चित्रपट महोत्सल. ही आमकां गोंयकारां खातीर अभिमानाची गजाल. मराठी चित्रपट महोत्सव महाराष्ट्रांत लगीत जायना, असो भव्य महोत्सव गोंयांत जाता, हाचें स्रय शेट्ये भावांक वता, अशें मुख्यमंत्र्यान सांगलें.
ह्या वेळार ज्येश्ठ कलाकार डॉ. मोहन आगाशे हांकां मराठी चित्रपट महोत्सवाचो अंदूंचो कृतज्ञता पुरस्कार भेटयलो.
मोहन आगाशे हांकां परबीं दितना मुख्यमंत्री डॉ. सावंत हांणी सांगलें, वैजकी पेशा वांगडाच चित्रपट मळार लेगीत तांचें व्हड योगदान आसा. ह्या दोनूय मळांचेर काम करप म्हणल्यार खूब कठीण गजाल. आपूण स्वता राजकारणांत येत सावन वैजकी सेवेचें काम बंद जालां.
ह्या वेळार गोंय मनरिजवण सोसायटीची उपाध्यक्ष आमदार डिलायला लोबो, पणजीचे महापौर रोहीत मोन्सेरात, व्हिन्सन वर्ल्डाचे संजय शेट्ये तशेंच श्रीपाद शेट्ये आनी सिने अभिनेते दिग्दर्शक महेश मांजरेकर माचयेर हाजीर आशिल्ले.
दोन दीस चलपी ह्या मराठी चित्रपट महोत्सवाक मराठी चित्रपट मळा वयले दिग्गज कलाकार आनी दिग्दर्शक हाजेरी लायतले, अशें आयोजकांनी म्हणलां.
ह्या सुवाळ्या उपरांत महेश मांजरेकर हांणी दिग्दर्शीत केल्लो ‘निरवधी’ चित्रपटाचो ग्रॅण्ड वर्ल्ड प्रिमियर केलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
