भांगरभूंय | प्रतिनिधी
दिवचल ः नागरिक केंद्रीत सेवांचो एक भाग म्हूण व्हड प्रमाणांत काम करपी कर्मचाऱ्यांच्या हाजीरीचें वेवस्थापन आनी निरिक्षण करपाचे पद्दतींत नव्या डिजिटल तंत्रगिन्यानाचो हो उपक्रम परिवर्तनकारी आसा. तशेंच बऱ्या प्रशासना खातीर, जापसालदारकी आनी नागरिक सेवा दिवपा खातीर डिजिटल तंत्रज्ञान वापरपाच्या आमच्या सतत वचनबद्धतेचें प्रतिबिंब आसा अशें मुख्यमंत्री डॉ. प्रमोद सावंत हांणी सांगलें.
गोंय सरकारान पंचायत कर्मचाऱ्यां खातीर एआय आदारीत फेशियल रेकग्निशन अटेंडन्स सिस्टम (नियमित गोंय) लाँच केली. “डिजिटल गोंय” हे मुखेल मोहिमे खाला पारदर्शकता, कार्यक्षमताय आनी डिजिटल प्रशासन वाडोवपाचे दिकेन एक म्हत्वाचो निर्णय म्हूण गोंय सरकारान राज्यांतल्या पंचायत खात्याच्या कर्मचाऱ्यां खातीर एआय आदारीत फेशियल रेकग्निशन अटेंडन्स मॅनेजमेंट सिस्टम अधिकृतपणान सुरू केली. ताचें उक्तावण मुख्यमंत्री डॉ. प्रमोद सावंत हांणी केलें. मंत्री मॉवीन गुदिन्हो, रोहन खंवटे, नीळकंठ हळर्णकार, सुभाष फळदेसाय आनी हेर मानेस्त हाजीर आशिल्ले.
ही पद्दत सुरवेक पंचायतीं खातीर टप्प्याटप्प्यान सुरू केल्या. ल्हव ल्हव ती गोंय सरकाराच्या सगळ्या कार्यालयांनी सुरु करतले असें मुख्यमंत्री डॉ. सावंत हांणी सांगलें.
हें अॅप चालीक लावपी संस्था आरएनआयटी एआय सोल्युशन्स लिमिटेडचे प्रकल्प अधिकारी एस एस कृष्णा आनी हेर प्रतिनिधी ह्या वेळार हाजीर आशिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
