उबर ॲपा वरवीं भाडी मारपी चार जाणांचेर येरादारी संचालनालयाची बडी

भांगरभूंय | प्रतिनिधी

दोन प्रकरणां फुडले कारवाये खातीर राज्य येरादारी प्राधिकरणांत दाखल

भांगरभूंय । प्रतिनिधी
पणजीः गोंयांत उबर ॲपा वरवीं बेकायदो भाडी मारपाच्यो चार घडणुको येरादारी संचालनालयान नोंद केल्यांत. तातुंतली दोन प्रकरणां फुडले कारवाये खातीर राज्य येरादारी प्राधिकरणांक धाडल्यांत. तातुंतले एक दाबोळे विमानतळाचेर जाल्यार उरिल्ली प्रकरणां मोपा विमानतळाचेर नोंद जाल्यांत, अशी म्हायती येरादारी खात्यान दिल्या.
राज्यांत आजून मेरेन उबर ॲपांक परवानगी ना देखून बेकायदेशीर रितीन काय टॅक्सीकार उबर ॲप वापरून भाडी मारतात असो बोवाळ थळावे टॅक्सिकार घालतात. विधानसभेंत लेगीत हो विशय बरोच तापलो.
येरादारी खात्यान दिल्ले म्हायती प्रमाण, थळाव्या टॅक्सिकारांनी बेकायदो उबर ॲपाच्या वापराचेर दाखल केल्ले कागाळी मदल्या चार कागाळींचेर चवकशी सुरू केल्या. हातूंत येसुदास राठोड, हुसैन बेग, मल्लिकार्जून पायान्नावार आनी प्रवीण बडगे ह्या टॅक्सीकारांक बेकायदो उबर ॲपा वरवीं भाडे मारतना धरून तांचेर चवकशी केल्या.
हातूंत शिव वॉरीयर युनायटेड टॅक्सी ब्रदर्स हांचेनी येसुदास राठोड (जीए 06 टी 5724) आनी हुसैन बेग (जीए 08 व्ही 3702) हांचे आड मोपा पुलिशेंत कागाळ दाखल केल्ली. ही कागाळ फुडले कारवाये खातीर मोपा पुलिसांनी येरादारी संचालनालयाक धाडल्या आनी हे विशींची चवकशी सुरू आसा.
जाल्यार उबर ॲप वरवीं भाडी मारतना मल्लीकार्जून पायान्नावार हाका (जीए 06 टी 6601) ह्या टॅक्सी सयत मोपा ट्रेफिक सेलान ताब्यांत घेतिल्लो जाल्यार प्रवीण बडगे हाका (जीए 06 टी 5711) हे टॅक्सी सयत दाबोळी विमानतळाचेर वास्को ट्रेफीक सेलान ताब्यांत घेतिल्लो.
दोगांचीय चवकशी केले उपरांत मल्लीकार्जून आनी प्रवीण हांणी कबूल केले की तांचेनी उबर ॲप डावनलोड करून आपली टॅक्सी त्या ॲपाचेर नोंद केली आनी ह्या ॲपाचेर तांका भाडे मेळटाले. भाडे मेळले उपरांत सोमनाथ कोरगांवकार हे नांव आशिल्ल्या बॅक खात्यांतल्यान तांकां पयशे येताले. पुलिसांनी दोगांच्या मोबायलातल्यांन उबर ॲप डिलीट केले.
हे विशींची फुडली कारवाय करपा खातीर ही दोनूय प्रकरणा राज्य येरादारी प्राधिकरणांक धाडल्यांत. पूण हे विशीं प्राधिकरणान आजून मेरेन कारवाय केला काय ना हे विशींची कसलीच म्हायती संचालनालयान दिवंक ना.