भांगरभूंय | प्रतिनिधी
खबरां संस्था
बर्मिंगहॅमः राष्ट्रकुल खेळां सर्तींत भारतान चवथें भांगरा पदक मेळयलें. सर्तीच्या पांचव्या दिसा बायलाचें लॉन बॉल्स सर्तीचे फायनलींत भारतीय चलयांनी दक्षीण आफ्रिकेक 17-10 अशें हारोवन भांगरा पदक जिखलें.
राष्ट्रकुल सर्तीच्या 92 वर्सांच्या इतिहासांत भारतान पदक मेळोवपाची इतिहासीक कामगिरी करून दाखयली. हाचे पयलीं हे सर्तींत भारताक कसलेंय पदक मेळूं नाशिल्लें. फायनलींत भारताच्या लवली चौबे, पिंकी, नयनमोनी सैकिया आनी रुपा रानी टिर्कीन शानदार प्रदर्शन केलें.
1930 वर्सा राष्ट्रकुल खेळांक सुरवात जाल्ली. तेन्नाच्यान लॉन बॉल्स खेळाचो हे सर्तींत आसपाव केल्लो. भारतीय पंगड हे सर्तींत वांटो घेताल्लो मात तांका पदक मेळोवप शक्य जायनाशिल्लें. 2010 वर्सा नवी दिल्लीत जाल्ले राष्ट्रकुल खेळांत भारताच्या दादल्यांच्या आनी बायलांच्या पंगडान लॉन बॉल्स सर्तीचे पात्रताय फेरयेंत प्रवेश केल्लो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
