भांगरभूंय | प्रतिनिधी
पणजीः उबर टॅक्सी ऍग्रीगेटर्सांक गोंयांत सेवा दिवपाक बंदी आसा. मात, ऑनलायन अॅप डावनलोड करीत वेवसाय सुरू आशिल्ल्याचें निदर्शनाक आयलां. दोन दीस आदीं मोपाचें भाडें घेवन बाणावलें आयिल्ल्या उबरच्या टॅक्सीकाराक बाणावलेच्या थळाव्या टॅक्सीकारांनी धरलो. ते उपरांत आयज मोपा विमानतळार आजून एकल्याक धरलो.
राज्य येरादारी परवानो आनी हेर थारायिल्लें नेम पाळनासतना उबेरा कडेन संबंदीत आशिल्लें टॅक्सीकार हॉटेलां, विमानतळ, दर्यादेग आनी हेर सुवातींनी बेकायदेशीर रितीन भाडें मारपाचें काम करतात.
जीए- 03 -व्ही- 7195 ह्या गाडयेंतल्यान पर्यटकांक व्हरपाक आयिल्ल्या एकल्याक मोपाचेर आशिल्ल्या टॅक्सीकारांनी हटकले. ताणें टॅक्सी चालकाक प्रस्न विचारले तेन्ना ताणें योग्य जाप दिवूंक ना. फाटलें कितलेशेच म्हयने अशो घडणुको घडत आसात अशें हांगाचे टॅक्सीकार सांगतात. सोशल मिडियाचेर हे घडणुकेचो व्हिडियो व्हायरल जाला.
हाचे आदीं मोपा विमानतळ पुलीस स्टेशनांत मोपा विमानतळार परवानगी नासतना प्रवाशांची येरादारी केल्ल्यान उबर टॅक्सी सेवे कडेन संबंदीत चालक आनी वेवस्थापना आड गुन्यांव नोंद केल्लो. ही घडणूक 6 ऑगस्टाक मोपा विमानतळार उजवाडाक आयिल्ली. ड्रायव्हर देवेंद्र सातार्डेकार हांणे जीए-06-टी-8723 ह्या गाडयेंतल्यान उबर मोबायल अॅपा वरवीं प्रवाशांक टॅक्सी सेवा दिवपाचें काम केलें. वागातोर- कायसुव टॅक्सी ऑपरेटर्स असोसिएशनाच्या टॅक्सीकरांनी बुधवारा उबेरा कडेन संबंदीत आशिल्लो टॅक्सी चालक देवेंद्र सातार्डेकार हाका धरलें. ताचे कडल्यान मेळिल्ले म्हायती प्रमाण, सोमनाथ कोरगांवकार (वास्को) हो गोंयांत उबेराचो मिडिएटर वा एजंट म्हणून काम करता.
उबेर आनी हेर टॅक्सी एग्रीगेटरां कडेन बेकायदेशीर टॅक्सी वेवसाय चलोवपाचो प्रस्न बिकेस्तारा आनी शुक्रारा विधानसभेंत मांडलो. आमदार विरेश बोरकार हांणी हो प्रस्न मांडलो आनी संबंदीत लोकां आड कारवाय करपाची मागणी केली. हाचेर बेगोबेग कारवाय करपाचें आश्वासन मुख्यमंत्र्यान दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
