भांगरभूंय | प्रतिनिधी
पणजीः गोंयांत काजरां आनी थळाव्या रेस्टॉरंण्टांक रातच्या उसरां मेरेन संगीत वाजोवपाची मेकळीक दिवपाक सर्वोच्च न्यायालयाक बायपास करिनासतना कायदो हाडून कितेंय तरी मार्ग काडटले अशें आस्वासन मुख्यमंत्री डॉ. प्रमोद सावंत हांणी दिलें.
रातच्या 10 वरां मेरेनूच म्युझीक वाजोवपाची मर्यादा आशिल्ल्यान हाचो परिणाम पर्यटनाक जावन पर्यटन खात्यान ह्या वर्सा रु. 1600 कोटी इतलो महसूल वगडायला. तशेंच हे मर्यादेक लागून काजारांचेर परिणाम जाला अशी खंत फातोड्डेंचे आमदार विजय सरदेसाय हांणी सभाघरांत उक्तायिल्ली.
हे विशीं जाप दितना पर्यावरण मंत्री आलेक्स सिक्वेरा हांणी सांगलें, संवसारीक भलायकी संघटणा (डब्ल्यूएचओ) हांणी घालून दिल्लीं मार्गदर्शक तत्वां आनी सर्वोच्च न्यायालाच्या निदेशांक लागून आमकां आवाजाची मर्यादा पाळची पडटा.
सरकारान सर्वोच्च न्यायालायच्या आदेशाक नियाळ याचिका दाखल करपाचो विचार सरकारान चलयला. तशेंच ह्या विशयाचेर मुख्यमंत्री डॉ. प्रमोद सावंत तीन खेपे केंद्रीय पर्यावरण मंत्री भुपेंद्र यादव हांकां ह्या विशया खातीर मेळ्ळ्यात, अशें पर्यावरण मंत्री आलेक्स सिक्वेरा हांणी सांगलें.
कर्नाटकांत सिद्धरमय्या हांच्या सरकारान बंगळुरूक सगल्या आस्थापनांनी पार्टी आनी म्युझीक चालू दवरपा खातीर रातच्या 1 वरां मेरेन उक्तें दवरपाचो निर्णय घेतला. बंगळुरू टॉप पर्यटन थळ जालां. देशांत आशिल्ले कायदे कर्नाटकाक लागतात. देखून कर्नाटक सरकारा भशेन गोंय सरकार कित्याक निर्णय घेना? सर्वोच्च न्यायालयांत नियाळ याचिकेच्या निर्णयाक कितलो तेंप लागत हें सांगूंक शकना, अशी सुचोवणी सरदेसाय हांणी केली.
गोंयांत हें शक्य आसा काय ना तें पयलीं हांव तपासतां. गोंयांत म्युझिकाचेर पर्यावरणवादी रोखडेच न्यायालयांत धांवतात म्हूण आमकां आडमेळीं येतात अशें मुख्यमंत्री डॉ. सावंत हांणी सांगलें.
आमकां पर्यटकांचे नदरेन आनी काजरां खातीर थाकाय दिवपाक म्युझीक रातच्या 12 मेरेन तरी वाजोवपा खातीर एक मार्ग सोदचो पडटलो. सर्वोच्च न्यायालयाच्या आदेशाक बायपास करिनासतना हे विशीं कायदो हाडपाचो विचार करतात अशें सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
