सर्वेक्षण आराखड्यांत छेडाछेड, कारवाय करपाचें मुख्यमंत्र्याचें आश्वासन

भांगरभूंय | प्रतिनिधी

पणजीः भूंय नकाशांत बदल करुन सर्वेक्षण आराखड्यांत 200 परस चड बांदकामां बेकायदो रितीन घाल्यात असो आरोप करुन विरोधकांनी बोवाळ घालो. हे विशीं चवकशी सुरु केल्ल्याचें येणावळ मंत्री बाबूश मोन्सेरात हांणी सांगलें. तर हे विशीं कडक कारवाय करपाचें आश्वासन मुख्यमंत्री डॉ. प्रमोद सावंत हांणी दिलें.
भूंय नकाशो साॅफ्टवेरा वरवी फटींगपण करून बांधकामां सर्वेक्षण आराखड्यांत घाल्यात. 200 परस चड बांदकामां बेकायदो रितीन सर्वक्षण आराखड्यात आस्पावल्यांत. सीआरझेड झोन लेगीत बदल्यात, असो आरोप केपेंचे आमदार एल्टन डिकोस्टा हांणी केलो.
हो सर्वेक्षण आराखडो 1972 वर्सा पयलींचो. त्या उपरांत कसलोच आराखडो तयार जावंकना, अशें बाबूश मोन्सेरात हांणी सांगलें. 2004 सालांत व्हीव्हीएन हे संस्थेन परत सर्वेक्षण करून कागदी आराखड्याचें रुंपातर डिजीटल आराखड्यात केलें आनी 1991 सालांत भूंय नकासो अस्तिवात आयलो. दरेकी धा वर्सांनी आराखड्यांत सुदारणा जावप हें गरजेचें. पुण 50 वर्सात हे जांवंकना. देखून काय गोंदळ तयार जाला, अशे रजाव मंत्र्यान दिलें.
200 परस बांधकामांची रचणूक सर्वेक्षण आराखड्यात बदलून सीआरझेड परवानगी खातीर घाल्या. पंजाबचे एका मनश्यान आराखड्यात बदल करून सीआरझेड परवानगी घेतल्या, असो आरोप विरोधी पक्ष फुडारी युरी आलेमाव हांणी केलो.
आयपी एड्रेसात बदल करून नकाशांत गुड्डुलेसांव केलां. एका मनश्यान रु. 600 कोटी इतले हातूंतल्यान जोडल्यात. हे एक खर गुन्यांवगारी कृत्य आसून हातूंत व्हडलो भ्रष्टाचार जाला. देखून हे विशींची चौकशी करपा खातीर विशेश तपास पंगड (एसआयटी) नेमची, अशी मागणी आलेमाव हांणी केली.
हे विशीं जाप दितना मुख्यमंत्र्यान सांगले सर्वेक्षण आराखडो 1997 सालात अधिसुचीत जाला आनी फक्त 2004 सालांत तातूत बदल जाल्यात. उपरांत हे आराखड्यांक हात लांवकना. हातूंत चवकशी करपा विशींचे आदेश आमी जिल्लोधिकाऱ्यांक दिल्यात. फाटले वर्सातच सर्वेक्षण आराखड्यात त्रुटी सोदून त्यो सुदारच्यो अशें निर्देश सगळे सर्वे आनी जमीन अहवाल निरिक्षकांक दिल्यात, अशें मोन्सेरात हांणी सांगले.
सर्वेक्षण आराखड्या कडे छेडछाड जाल्या अशी कागाळ दक्षता खात्यात दाखल जाल्ली. पुण उपरांत त्याच मनश्यान ही कागाळ फाटीं घेतली. ह्या प्रकरणात कारवाय जातलीच, अशें आश्वासन मुख्यमंत्र्यान दिलें.