भांगरभूंय | प्रतिनिधी
पणजीः राज्यांत काजरां आनी थळाव्या रेस्टोरंटांक रातचें उसरां मेरेन संगीत वाडोवपाची मेकळीक दिवपाक सर्वोच्च न्यायालयाक बायपास करिनासतना कायदो हाडून कितेंय तरी मार्ग काडटले, अशें आस्वासन मुख्यमंत्री डॉ. प्रमोद सावंत हांणी दिलें.
रातचीं १० वरां मेरेनूच म्युजीक वाजोवपाची मर्यादा आशिल्ल्यान हाचो परिणाम पर्यटनाक जावन पर्यटन खात्यान ह्या वर्सा रु. १६०० कोटी इतलो महसूल वगडायला. तशेंच हे मर्यादेक लागून काजारांचेर परिणाम जाला, अशी खंत फातोड्डेंचे आमदार विजय सरदेसाय हांणी सभाघरांत उक्तायल्ली.
हे विशीं जाप दितना पर्यावरण मंत्री आलेक्स सिक्वेरा हांणी सांगलें, संवसारीक भलायकी संघटणा (ड्ब्ल्यूएचओ) हांणी घालून दिल्लीं मार्गदर्शक तत्वां आनी सर्वोच्च न्यायालाच्या निर्देशांक लागून आमकां आवाज मर्यादा पाळची पडटा.
सरकारान सर्वोच्च न्यायालायच्या आदेशांक नियाळ याचिका दाखल करपाचो विचार सरकारान चलयला. तशेंच ह्या विशयाचेर मुख्यमंत्री डॉ. प्रमोद सावंत तीन खेपे केंद्रीय पर्यावरण मंत्री भुपेन्द्र यादव हांकां ह्या विशयाखातीर मेळ्ळ्यात, अशें पर्यावरण मंत्री आलेक्स सिक्वेरा हांणी सांगलें.
कर्नाटकात सिध्दारमय्या हांच्या सरकारान बंगळुराक सगल्या आस्थापनांनी पार्टी आनी म्युजीक चालू दवरपा खातीर रातच्या १ मेरेन उक्तें दवरपाचो निर्णय घेतला. बंगळूर टॉप पर्यटन थळ जालां. देशांत आशिल्ले कायदे कर्नाटकाक लागतात. देखून कर्नाटक सरकारा भशेन गोंय सरकार कित्याक निर्णय घेना? सर्वोच्च न्यायालयांत नियाळ याचिकेच्या निर्णयांक कितलो तेप लागत हें सांगपाक शकना, अशी सुचोवणी सरदेसाय हांणी दिली.
गोंयांत हें शक्य आसा काय ना तें पयलीं हांव तपासतां. गोंयांत म्युजिकांचेर पर्यावरण वादी रोखडेच न्यायालयांत धांवतात म्हण आमकां आडमेळीं येतात, अशें मुख्यमंत्री डॉ. सावंत हांणी सांगलें.
आमकां पर्यटकांचे नदरेन आनी काजरां खातीर थाकाय दिवपाक म्युजीक रातचें १२ मेरेन तरी वाजोवपा खातीर एक मार्ग सोदचो पडटलो. सर्वोच्च न्यायालयाच्या आदेशांक बायपास करिनासतना हे विशीं कायदो हाडपाचेर विचार करतां, अशें सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
