भांगरभूंय | प्रतिनिधी
पणजी: गोंयांत फाटल्या वर्सा 1 जानेवारी ते 3 ऑगस्ट मजगतीं घरफोडीच्या 74 घडणुकांची नोंद जाल्ली. अंदूं ह्याच काळांत घरफोडीच्या 48 घडणुकांची नोंद जाल्या. फाटल्या वर्साचे तुळेन अंदूं पयल्या आठ म्हयन्यांत घरफोडीच्या प्रकरणांत 35.14 टक्क्यांनी उणाव जाला. सत्तरी- केरी हालींच जाल्ल्या चोरयेच्या प्रकरणाचाे तपास सुरू आसा अशें मुख्यमंत्री डॉ. प्रमोद सावंत हांणी सांगलें.
बिरेस्तारा विधानसभेंत आमदार देविया राणे हांणी मांडिल्ल्या लक्ष ओडपी सुचोवणेचेर ते उलयताले.
मुख्यमंत्र्यांनी म्हणलें, कांय दिसां पयलीं दोनमाड केरी हांगा चार दुकानां फोडिल्लीं. चोरांनी हातूंतल्या तीन दुकानांतल्यान म्हाल चोरून व्हेलो ना. पूण चौथ्या दुकानांतल्यान सोऱ्यांच्यो 1100 रुपया मोलाच्यो पांच बाटल्यो चोरून व्हेल्यो. हे विशींचो फुडलो तपास सुरू आसा. आमी पुलिसांक वाळपय वाठारांत रातची गस्त वाडोवपाची सुचोवणी केल्या. गस्ती वेळार वरिश्ठ अधिकारी लेगीत हाजीर आसतले. हांगा आलायतें रॉबर्ट वाहन दिलां. सालेली चोरी प्रकरणांत दोगांक ताब्यांत घेतल्यात.
ताचे पयलीं आमदार देविया राणे दोनमाड, केरी वाठारांत चोरयांचें प्रमाण वाडिल्ल्यान लोकां मदीं भिरांतीचें वातावरण आशिल्ल्याचें सांगलें. तांणी म्हणलें, फाटल्या कांय दिसांत ह्या वाठारांत पांच चोरयेच्यो घडणुको घडल्यात. पुलीस आनी येरादारी पुलीस केरी नाक्यार सक्रीय आसतात. पूण ह्या वाठारांत गुन्यांव आडावपा खातीर कसलेच यत्न जायनात. रातच्या वेळार पुलिसांची गस्त जायना. केरी नाक्या वेल्यान गोंयांत कोण येतात आनी कोण वतात हे विशीं खर तपासणी जावंक जाय.
चोरयेच्यो घडणुको 16 टक्क्यांनी उण्यो
फाटल्या वर्साच्या जानेवारी ते एप्रील म्हयन्याचे तुळेन अंदूं चोरयेच्यो घडणुको 16.1 टक्क्यांनी उण्यो जाल्यात. जाल्यार भांगराची सरपळी चोरपाचे प्रमाण 50 टक्क्यांनी, बायलां आडच्या गुन्यांवांचें प्रमाण 21.5 टक्क्यांनी जाल्यार मारपेटीच्यो घडणुको 11.4 टक्क्यांनी उण्यो जाल्यात अशें मुख्यमंत्री डॉ. प्रमोद सावंत हांणी म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
