भांगरभूंय | प्रतिनिधी
पणजीः टीसीपीच्या कलम 39 (अ) खाला 2.70 लाख चौ. मि. जमनीचो झोन बदल्ला. 950 अर्ज आयिल्ले तातूंतले फक्त 200 अर्जांक मार्गदर्शक तत्वांक खरसाणेन पाळो दिवन ते विचारात घेतल्यात अशी म्हायती नगर नियोजन मंत्री विश्वजीत राणे हांणी दिली.
कलम 39 (अ) खाला गोंयांत आतां मेरेन कितल्या जमनीचो झोन बदल जाला असो प्रश्न सांत आंद्रेंचे आमदार विरेश बोरकार हांणी सभाघरांत प्रस्न जापेच्या वेळार केलो.
हे विशीं जाप दितना नगर नियोजन मंत्री विश्वजीत राणे हांणी सांगलें की कलम 39 (अ) ही एक उत्कृश्ट यंत्रणा आसा अशे न्यायालयान नमूद केलां. जितले अर्ज आयल्यात तांचे अजून मेरेन झोन बदलाची निमाणी अधिसुचोवणी येवंक ना. नगर नियोजन खात्या कडेन 39 (अ) खाला 950 अर्ज आयिल्ले. तातूंतल्या 200 अर्जांचेर मार्गदर्शक तत्वा प्रमाण विचारांत घेवन 2.70 लाख चौ. मि. जमनीचो झोन बदल केला अशी म्हायती मंत्री राणे हांणी दिली.
झोन बदला विशीं आमी पुराय मार्गदर्शक तत्वांक पाळो दिवनच प्रक्रिया करतात. हातूंत कायद्याचें कसलेंच उल्लंघन जायना. जे अर्ज मार्गदर्शक तत्वा आड आसात तांकां कशीच मान्यताय मेळना. जर मार्गदर्शक तत्वांचे उल्लंघन जालां आसत जाल्यात ते विशींची विशिश्ट कागाळ दाखल करची अशें मंत्र्यांनी सांगलें.
झोन बदला विशीं नगर नियोजन मंत्र्यान सारखी जाप दिवंक नाशिल्ल्याचो आरोप करून विरोधी पक्ष फुडारी युरी आलेमांव हांणी बोवाळ मारपाक सुरवात केली.
जमनीचे झोन बदल कितले जाल्यात, म्हाल पांवड्यार कितले जाल्यात अशा तपशिला सयत म्हायती मागिल्ली. पूण हाचे जाप दितना भलतेच अनुच्छेद लायल्यात. सगल्या जापांनी त्रुटी दिसून आयल्यात. देखून नगर नियोजन मंत्र्यान टीसीपी कलम 16 (ब), 17 (2) आनी 39 (अ) खाला झोन बदलाचे कितले अर्ज स्विकारल्यात हाची जाप दिवची अशी मागणी आलेमांव हांणी केली.
टीसीपी कलम 16 ब खाला 9 हजार अर्ज आयिल्ले आनी 1.35 कोटी चौ. मि. जमनीचो झोन बदल केल्लो आनी नगर नियोजन खात्याने हें कलम आतां रद्द केलां. कलम 17 (2) खाला 17 लाख चौ. मि. जमनीचो झोन बदल जाल्लो. पूण सर्वाेच्च न्यायालयांत हो विशय प्रलंबीत आसा. कलम 39 (अ) खाला सुमार 950 अर्ज आयल्यात. तातूंतले 200 अर्जांक मान्यताय दिवन 2.70 लाख चौ. मि. जमनीचो झोन बदल केला अशी म्हायती मंत्र्यान दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
