भांगरभूंय | प्रतिनिधी
पणजी : सनबर्न ईडीएम फेस्टिव्हल अंदूं गोंयांत न्हय तर मुंबय जातलो. १९ ते २१ डिसेंबर २०२५ मजगतीं हो तीन दिसांचो म्युझीक फेस्टिव्हल आयोजीत करतले, हे विशीं आयोजकांनी काल जारी केल्ल्या अधिकृत निवेदनांत ही म्हायती दिली. गोंयांत खुबश्या पांवड्यावेल्यान जावपी विरोध आनी प्रशासनी आडमेळ्यांक लागून हो निर्णय घेतिल्ल्याचें सांगलें.
हे फाटभूंयेर पर्यटनमंत्री रोहन खंवटे हांणी स्पश्ट केलें, सनबर्न ही खासगी कार्यावळ आनी ती गोंयांत आयोजीत करची काय ना, हो निर्णय आयोजकांचोच आसा. तशेंच सरकारान हातूंत हस्तक्षेप करपाची गरज ना, अशेंय तांणी स्पश्ट केलें. खंवटे हांणी सांगलें, गोंय हें देशांतलें आघाडेचें पर्यटनस्थळ आनी ते खातीर नाका जाल्ले नामनेची गरज ना. राज्यांत खुबश्या सर्जनशील उपक्रमां वरवीं पर्यटन धोरण राबयता. हातूंत थळावी संस्कृती, पर्यावरण जपपाचेर भर दितात.
मजगतीं, गोंयांत खुबश्या सुवातांचेर व्हडा प्रमाणांत जावपी वेवसायीक कार्यावळीं विशीं सभापती रमेश तवडकार हांणी आपली भुमिका परत एक फावट स्पश्ट केली. सनबर्ना सारकिल्ल्यो वेवसायीक कार्यावळी उत्तर गोंयांतूच योग्य आसात, दक्षीण गोंयांन आपली परंपरी, सांस्कृतीक वळख जपल्या. दक्षीण गोंय हें गोंयचें सांस्कृतीक केंद्र. हाका लागून हांगा परंपरीक मुल्यां सयत कार्यावळ आयोजीत जावपाक प्राधान्य दिवचें, अशे तवडकार हांणी मुखार सांगलें. तांचो विरोध एकाद्या विशिश्ट फेस्टिव्हला कडेन न्हय, जाल्यार पुराय धोरणात्मक दृश्टीकोनांतल्यान आसा, अशेंय तांणी स्पश्ट केलें.
गोंयची संस्कृती जपप आनी पर्यटनाचे उदरगतींत समतोल राखपाच्या मुद्यावेल्यान परत एक फावट राज्यांत बरीच व्हड चर्चा जाली. सनबर्नच्या स्थलांतरा उपरांत गोंयाच्या हेर व्हड इव्हेंट्सां वांगडाय योग्य ती भुमिका घेवची अशें मत विवीध पांवड्यांवेल्यान उक्तायतना दिसलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
