भांगरभूंय | प्रतिनिधी
तिवरें-वरगांवची उपसरपंच सुमित्रा नायक हांचे आड अविस्वास थाराव
माशेल: तिवरें-वरगांवची उपसरपंच सुमित्रा नायक हांचे आड सरपंच जयेश नायक, पंच वांगडी एकनाथ परब, संजीव कुंडयकार, अपर्णा आमोणकार आनी यशवंत जल्मी हांणी अविस्वास थाराव दाखल केला.
आमदार गोविंद गावडे हांकां मंत्रीमंडळांतल्यान काडले उपरांत प्रियोळ मतदार संघातले पंचायतींत अविस्वासाचें सत्र चालू जालां. सगळे कडेन राजकारण बरेंच तापलां, ह्यान पयलीं जुलयांत खांडोळेचे सरपंच विशांत नायक हांचेर अविस्वास थाराव आयिल्लो. मात एके नाटकी घडामोडी उपरांत तो थाराव भायर पडलो. ते खातीर आमदार गावडे हांणी यत्न केले अशें कळटा. तेन्ना विशांत नायक सरपंच पदार तशेच उरले. उपरांत भोमाचे सरपंच सोनु नायक हांचेर अविश्वास दाखल केलो. ताचेर ७ ऑगस्टाक चर्चा जाली तेन्ना सरपंच सोनु नायक हाजीर रावूंक ना आनी बाकीचे उपसरपंच प्रतिमा सं. फडते गांवकार, पंच वांगडी शैला आ. नायक, सुनील ध. जल्मी, अब्दुल एम. रहिमान खान, मिताली म. फडते, दामोदर श्री. नायक हे पंच वांगडी हजर राविल्ल्यान ह्या वेळार ६ आड ० मतांनी अविस्वास थाराव संमत जालो.
सुनील ध. जल्मी आनी दामोदर नायक हांचे मदीं पडनाशिल्लें. हाका लागून सरपंच पदार सोनु अ. नायक हांची वर्णी लागिल्ली. आतां दोनूय गटांनी हात मेळयिल्ल्यान आयज हें शक्य जालां, अशी चर्चा चलता. आतां सरपंच पदाची माळ सुनील ध. जल्मी हांच्या गळ्यांत पडटली अशी खबर आसा.
तिवरें वरगांवची उपसरपंच सुमित्रा नायक हांचेर अविस्वास थाराव दाखल केला. तेन्ना विरोधी गटांतली पंच वांगडी अपर्णा आमोणकार हांणी ह्या थारावाचेर सय केले उपरांत घडये तांच्या गळ्यांत उपसरपंच पदाची माळ पडण्याची शक्यताय वाडल्या.
फुडाराक ह्या मतदारसंघातल्या पंचायतींत केन्ना अविस्वास थाराव दाखल जायत, हें सांगपाक येना. ह्यो पंचायती हातांतल्यान वयच्यो न्हय म्हूण आमदार गोविंद गावडे आपली राजकी तांक लायतले, अशी चर्चा तांच्या कार्यकर्त्यां मदीं आयकूंक मेळटा. भोम अडकोण पंचायत मात तांच्या हातांतल्यान गेल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
