भांगरभूंय | प्रतिनिधी
माशेल: भोम अडकोण पंचायतींत बिरेस्तार ७ ऑगस्टाक सकाळीं जाल्ल्या अविस्वास थारावाचे चर्चे वेळार सरपंच सोनु अ. नायक हे हजर रावंक नात. हाका लागून हो अविस्वास थाराव ६ आड ० मतांनी संमत जालो.
ह्या वेळार उपसरपंच प्रतिमा सं. फडते गांवकार, पंच वांगडी शैला आ. नायक, सुनील ध. जल्मी, अब्दुल एम. रहिमान खान, मिताली म. फडते, दामोदर श्री. नायक हजर आशिल्लीं.
ह्या वेळार फोंडें गट विकास कार्यालयाचे प्रदिप गावडे वेंचणूक निरिक्षक म्हणून हजर आशिल्ले. तांणी हो निकाल जाहीर केलो. पंचायत सचीव विराज नायक हांणी सहाय्यक म्हणून काम केलें.
पंच वांगडी सुनील ध. जल्मी आनी पंच वांगडी दामोदर नायक हांणी हात मेळयिल्ल्यान आयज हें शक्य जाल्ल्याचें आनी आमदार गोविंद गावडे हांचे यत्न उणे पडिल्ल्याची चर्चा सध्या ह्या वाठारांत चल्ल्या.
मजगतीं, सरपंच पदाची माळ सुनील ध. जल्मी हांच्या गळ्यांत निश्चीत आसा अशें चित्र हांगा पळोवपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
