भांगरभूंय | प्रतिनिधी
पणजीः बाजारांत बसपी परंपरीक माटोळेकारां कडल्यान सोपो कर घेवचो न्हय अशे निर्देश पंचायत आनी पालिकांक दितले. तशेंच जे भायले लोक होलसेल दरांत फुलां विकतात तांचेर कारवाय करपाचे निर्देश पुलिसांक दितले, अशें आस्वासन मुख्यमंत्री डॉ. प्रमोद सावंत हांणी दिलें.
परंपरीक माटोळेकार आनी रस्त्यार फुलां विकपी भायल्या लोकांचो विशय फातोड्डेंचे आमदार विजय सरदेसाय आनी सांत आंद्रेचे आमदार विरेश बोरकार हांणी सभाघरांत शुन्य प्रहारा वेळार माडिल्लो.
जे गोंयकार गांवठी भाजी पिकयतात तांकां त्यो विकपा खातीर बाजार मेळना. देखून तांकां आपल्यो गांवठी भाजी विकपाक मेळच्यो हे खातीर तांकां पंचायतीन आतां सावन ते चवथीच्या ११ दिस मेरेन बाजाराची सुवात तयार करून दिवची, अशीं मागणी सरदेसाय हांणी केली.
तशेंच मुख्यमंत्री आपलो अर्थसंकल्प चवथीचे माटोळे सारकी स्वंयपुर्ण आसा अशें म्हणटा. मात गोंयकारांची चवथीची खरी माटोळी स्वंयपुर्ण करपाचेर लक्ष दिवचें. देखून जें परंपरीक माटोळेचें सामान विकतात तांकां त्रास करचे न्हय आनी तांकां सोपो माफ करचो, अशी मागणी सरदेसाय हांणी केली.
मजगतीं बाजारांत फुला विकपा खातीर सुवातो निश्चीत केल्यात थंयसरूच बसून हो वेवसाय करपाक जाय. मात भायले लोक येवन रस्त्या कुशीक ठोक फुलां जशे रोजां विकतात. ह्या प्रकारांक लागून बाजारांत जीं थळावीं फुलकारां आसात तांचेर हावळ आयल्या, अशी कागाळ सांत आंद्रेचे आमदार विरेश बोरकार हांणी केली.
जे पंरपरीक माटोळेकार बाजारांत माटोळेचें सामान विकतात तांकां थाकाय दिवन तांचे कडल्यान सोपो कर वसूल करचो न्हय अशे निर्देश पालिका आनी पंचायतीक दितले. तशेंच जे भायले लोक रस्त्यार होलसेल फुलंा विकतात तांचेर कारवाय करपाचे निर्देश पुलिसांक दितले, अशें आस्वासन डॉ. सावंत हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
