भांगरभूंय | प्रतिनिधी
पणजी : बायणा- वास्कोच्या एका कुटुंबाक आदल्या वादावेल्यान वायट उतरां, मारपेट आनी जिवें मारपाची धमकी दिल्ले खातीर तिगां आड गुन्यांव दाखल केला. ५ ऑगस्टाचे मध्यानरातीं सुमार १ वरांचेर ही घडणूक घडली.
ह्या प्रकरणा विशीं संध्या चौहान हांणी दिल्ले कागाळी प्रमाण, दुबावीत शरण्य पालकार, साईश थापा आनी तौफीक (तिगूय वास्को रावतात) हांणी आदले दुस्मानकायेवेल्यान संध्याचो घोव शिवा हरिजन हाका बुरशीं उतरा दिलीं. शर्नय पालकार हांणी बळयां घरांत घुसून शिवा हाका ओडून भायर काडलो आनी त्या तिगांयनी मेळून ताचेर खोटांनी, मुठी घालून ताका मारपेट केली. जाल्यार साईश थापा हांणी हरिजन हांच्या पांयार गॅस सिलिंडर घालून मारपेट केली. हातूंत तांकां बरीच दुखापत जाली. मारपेट केले उपरांत त्या तिगांयनी संध्या चौहान, तिचो घोव आनी शेजार्यांक जिवें मारपाची धमकी दिली, अशें कागाळेंत म्हणलां.
ह्या प्रकरणांत वास्को पुलिसांनी भारतीय न्याय संहिता २०२३ तल्या कलम ३५२, ३२९(४), ११८(२), ११५(२) आनी ३(५) अन्वये गुन्यांव नोंद केला. मुरगांवचे उपअधीक्षक गुरुदास कदम हांच्या मार्गदर्शना खाला तशेंच निरीक्षक वैभव नायक हांच्या फुडारपणा खाला उपनिरीक्षक अर्चना गांवकार फुडलो तपास करतात.
मजगतीं, आनीक एके म्हायती प्रमाण, ४ ऑगस्टाक रातच्या साडेइकरा वरांचेर मरीन इलेक्ट्रिकल्स वाठारांत शिवा हरिजन (बायणा) हांणे सोर्याचे घुंवळेंत शरण्य पालकाराचेर फातर मारपाचो यत्न केलो. मात तो चुकले उपरांत हरिजनान सुर्यान वार केलो. हातूंत पालकार हाका दुखापत जाली. हे विशीं पालकार हांणी वास्को पुलीस स्टेशनांत कागाळ नोंद केली. कागाळे उपरांत वास्को पुलिसांनी शिवा हरिजना आड भारतीय न्याय संहिता २०२३ च्या कलम ३२४ आनी ११८ (१) खाला गुन्यांव नोंद केल्लो. ह्या प्रकरणाचो तपास वास्को पुलीस स्टेशनांतली कॉन्स्टेबल श्रद्धा नायक करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
