भांगरभूंय | प्रतिनिधी
आमदारांची मागणी; मुळाव्यो शाळा बंद पडपा विशीं उक्तायलो हुस्को
पणजी : शाळा, विद्यालयांनी मुळाव्यो सुविधा तयार करपा सयत शिक्षकांचो उणाव पयस करपाची मागणी सत्ताधारी तशेंच विरोधी आमदारांनी केली. सरकारी मुळाव्यो शाळा बंद पडपा विशीं आमदारांनी हुस्को उक्तायलो. शिक्षण तशेंच खण खात्याच्या मागण्यांचेर सभाघरांत चर्चा जाली.
आमदार कार्लोस फेरेरा, डिलायला लोबो, मायकल लोबो, वेन्झी व्हिएगश, प्रेमेंद शेट, देविया राणे, गोविंद गावडे, संकल्प आमोणकार, गणेश गांवकार, दिगंबर कामत, राजेश फळदेसाय, कृष्णा साळकार, विरेश बोरकार, निलेश काब्राल, क्रुझ सिल्वा, विजय सरदेसाय, रुडाॅल्फ फर्नांडीस, डॉ. चंद्रकांत शेटये, युरी आलेमांव हांचीं भाशणां जालीं.
सरकारान राष्ट्रीय शिक्षण धोरणाची कार्यवाही ताकतीक करून केल्या. हाका लागून विद्यार्थ्यां वेलो ताण वाडला. शिक्षण, खेळ आनी हेर कार्यावळी हातूंत ताळमेळ आसूंक जाय. विद्यार्थ्यां वेलो ताण वाडिल्ल्यान विद्यालयांत पुराय वेळ समुपदेशकांची नेमणूक करपाची गरज आसा अशें आमदार कार्लोस फेरेरा हांणी सांगलें.
सगल्या विद्यालयानी इंटरनॅट कनेक्टिव्हिटी दिवपा सयत मुळाव्या सुविधां कडेन लक्ष दिवपाची मागणी आमदार संकल्प आमोणकार हांणी केली. बालरथ बशींची देखरेख लेगीत सारकी जायना अशी कागाळ तांणी केली.
मुळाव्या शाळांनी शिक्षकांचो उणाव आसा. कांय शाळांनी एकूच शिक्षक आसा. शिक्षकांची भरती करपाची मागणी आमदार प्रेमेंद्र शेट हांणी केली. सरकारी मुळाव्यो शाळा बंद पडल्यात. ह्यो शाळा कित्याक बंद पडल्यो हाचो अभ्यास जावपाची गरज शेट हांणी उक्तायली.
गोंयांत खूबशे शिक्षक कंत्राटाचेर आसात. दर्जेदार शिक्षणा खातीर कंत्राटी शिक्षकांक सेवेंत कायम करपाची मागणी आमदार देविया राणे हांणी केली. सत्तरीत 62 मुळाव्यो शाळा ह्यो एक शिक्षकी आसात. ह्या शाळांनी आनीक शिक्षकांची वेवस्था करपाक जाय. शिक्षकांचेर ताण येताच. तशेंच शिक्षणाच्या दर्जाचेर परिणाम जाता अशें देविया राणे हांणी सांगलें.
राष्ट्रीय शिक्षण धोरणाच्या कार्यवाहे खातीर स्मार्ट क्लासरूम तयार जावपाची गरज आसा. बऱ्योच शाळा तशेंच विद्यालयांनी मुळाव्या सुविधाचो उणाव आसा. मुळाव्यो सुविधा तयार जावपा सयत शिक्षकांचो उणाव पयस करपाची मागणी आमदार दिगंबर कामत हांणी केली.
शाळा, विद्यालयांनी पियेवपाच्या उदकाची वेवस्था करपा सयत चलयां खातीर सॅनिटरी पॅड्स दिवप गरजेचें आशिल्ल्याचें आमदार कृष्णा साळकार हांणी सांगलें.
कुडचड्यार सरकारी तंत्रनिकेतन इमारतीचें काम पुराय जावंक ना. इमारत पुराय करपा सयत साधनसुविधा उपलब्ध करपाची मागणी आमदार निलेश काब्राल हांणी केली.
खण वेवसाया कडेन चड लक्ष जाय: मायकल लोबो
मुख्यमंत्री डॉ. प्रमोद सावंत हांणी मंगळारा 25 खात्यांच्या मागण्यांक जाप दिली. तांचे कडेन चड खातीं आसात. रोजगार तयार जावपा खातीर आनीक खणीं सुरू करपाची गरज आसा. खण खात्या कडेन चड लक्ष दिवपाची गरज आसा अशें मायकल लोबो हांणी सांगलें.
कांय खातीं मायकल लोबो कडेन दिवचीं: वेंझी व्हिएगश
मुख्यमंत्री डॉ. प्रमोद सावंत हांचे कडेन शिक्षण, खण, गृह, भौशीक बांदकाम मेळून बरींच खातीं आसात. मायकल लोबोक मंत्री करून तांचे कडेन कांय खातीं दिवचीं अशी सुचोवणी वेंझी व्हिएगश हांणी केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
