भांगरभूंय | प्रतिनिधी
पणजी: मुरगांव बंदर प्राधिकरणांतल्या (एमपीएम) बंदरा खाला म्हाल येरादारी करपी थळाव्या ट्रक चालकांचेर अन्याय करतात. हांगा थळावे ट्रक काडून तामीळनाडू राज्यांतले ट्रक हाडल्यात. हांगा सुरू आशिल्ल्या हेर गैरप्रकारा विशीं कारवाय करपाची मागणी आमदार संकल्प आमोणकार हांणी केली. बुधवारा ते विधानसभेंत लक्ष ओडपी सुचोवणेचेर उलयताले.
हाचेर मुख्यमंत्र्यांनी केंद्रीय बंदर कप्तान मंत्र्या कडेन चर्चा करून हो प्रस्न सोडयतले अशें आस्वासन दिलें.
ताचे पयलीं आमोणकार हांणी सांगलें, एमपीएमांतल्या बर्थ क्रमांक 10 आनी 11 खाजगी कंपनी कडेन दिल्यात. ह्या कंपनी खाला येरादारी करपी तामीळनाडू पासींग ट्रक हाडल्यात. ह्या ट्रकांच्या वाहनांची तांक चड आसा. ह्या कंपनीन फोर्क लिफ्टचे नोंदणींत घोटाळो केल्ल्याचो अरोप आसा. तांणी फटवणूक करून तामीळनाडूचें पासीांग बदलून गोंय पासिंगेच्यो बनावट नंबर प्लेटी बसोवन घेतल्यात. हे विशीं एफआयआर दाखल जावन लेगीत तांचेर कसलीच कारवाय करिनात.
विरोधी पक्ष फुडारी युरी आलेमांव हांणी एमपीएम गोंयांत आसून लेगीत स्वतंत्र राज्य आशिल्ले भशेन वागत आशिल्ल्याचो अारोप केलो. थळाव्यांक गेट बंद करप, परंपरीक वाटो आडावप अशे प्रकार करून एमपीएम दादागिरी करीत आशिल्ल्याचें तांणी म्हणलें.
आमदार विजय सरदेसाय हांणी मंगळूर आनी जयगड बंदरां केंद्रा खाला येत आसलीं तरी तांणी थळाव्यांक प्राधान्य दिवपाचे नेम केल्ल्याचें सांगलें. अशेच नेम गोंयांत करपाची मागणी तांणी केली.
लिव्ह लायसेन्साचेर वाहन नोंदणी नाका
विजय सरदेसाय हांणी म्हणलें, सरकारान लिव्ह अॅण्ड लायसन्स कबलातीचेर वाहन नोंदणी दिवप बंद करूंक जाय. हाका लागून हेर राज्यांतलीं वेवसायीक वाहनां गोंयांत नोंदणी करतात. हाका लागून थळावे येरादारी वेवसायीक घाताक येतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
