भांगरभूंय | प्रतिनिधी
सगल्या शिक्षकांच्या पात्रतायेची जातली तपासणी
पणजी: सरकारी आनी अनुदानीत विद्यालयांतल्या शिक्षकांच्या पात्रतायेची तपासणी जातली. पात्र नाशिल्ल्या शिक्षकांक घरा धाडटले अशें मुख्यमंत्री डॉ. प्रमोद सावंत हांणी सांगलें. गोंयांत 10 वर्सां पुराय केल्या कंत्राटी शिक्षकाक सेवेंत कायम करपा खातीर येवजण सुरू जातली. खंयच्याच शिक्षकाक सरकारान नोकरेंतल्यान काडूंक ना. कंत्राटी वा हेर सगल्या शिक्षकांक म्हयन्याक 25 हजारा वयर पगार मेळटा. कोणाकूच 8 हजार रुपया पगार मेळना, अशें मुख्यमंत्री डॉ. प्रमोद सावंत हांणी सांगलें.
शिक्षण, खण, म्युझीयम ह्या खात्यांच्या मागण्यांक जाप दितना तांणी ही म्हायती दिली.
बालरथ येवजणे खाला दिल्ल्यो पोरण्यो बशी टप्प्या टप्प्यान बदलतले. पंदरा वर्सां पुराय जाल्ल्या बशींक फिटनेस प्रमाणपत्र घेवचें पडटलें. फिटनेस प्रमाणपत्र नासत जाल्यार बस कावलांत काडची पडटली. 90 टक्के सरकारी विद्यालयांची दुरुस्ती पुराय जाल्या. उरिल्ल्या 10 टक्के विद्यालयांची दुरुस्ती 6 म्हयन्यां भितर जातली.
गोंय विद्यापिठात 1 लाख 20 हजार चौमि जाग्याचेर फार्मसी म्हाविद्यालय, कला म्हाविद्यालयांचें स्थलांतर जातलें.
पोरणे गोंय हांगा शेती खात्याच्या 10 हजार चौमि सुवातेर म्युझीयम इमारत जातली. केंद्रा कडल्यान 10 कोटींचे साहाय मेळटलें. ह्या वर्सा बुन्याद घालतले.
संजिवनीची निविदा 8 ते 10 दिसांत
खासगी एजन्सी वतीन संजिवनी साकर कारखानो परतून सुरू करपा खातीर परतून निविदा जारी जातली. ही निविदा 8 ते 10 दिसांत जारी जातली अशें मुख्यमंत्री डॉ. प्रमोद सावंत हांणी सांगलें.
उत्तर गोंयांत 6 आनी दक्षीण गोंंयांत 1 मेळून 7 खण ब्लॉकांच्या लीज कबलातीचेर बेगिनूच सयो जातल्यो. सध्या 3 खण ब्लॉक सुरू जाल्यात. दोन म्हयन्यां भितर शिरगांव आनी कुडणें ब्लॉक सुरू जातलो. तशेंच दक्षीण गोंंयांतल्या 20 डम्पाची बेगिनूच पावणी जातली अशें मुख्यमंत्री डॉ. प्रमोद सावंत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
