भांगरभूंय | प्रतिनिधी
पणजीः गोंयच्या पंचायत मळार वाहक तांकी विशीं मुख्यमंत्र्या कडेन उलोवन अभ्यास करतले. मुळाव्या साधन सुविधांचो उणाव जावचो न्हय म्हूण मेगा प्रकल्पां खातीर यंत्रणा थारावपा खातीर समिती गठीत करपाचो सरकाराचो विचार आसा अशें पंचायत मंत्री माॅवीन गुदिन्हो हांणी सांगलें.
गोंयच्या गांवगिऱ्या वाठारांत मेगा प्रकल्प येवन गांवांचो पुराय नकासो बदल्ला. रस्ते, सुवातो आनी उदका सारकिल्ली गरजेची वस्तू लक्षांत घेनासतना हे प्रक्लप आयल्यात. देखून मुळाव्या सुविधांचो सांबाळ करपा खातीर पंचायती राज कायद्यांत सुदारणा करून सरकार वाहक क्षमेतायेचें विश्लेशण करतले? असो प्रस्न हळदोणेंचे आमदार कार्लोस फेरेरा हांणी केलो.
गांवगिऱ्या वाठारांक जांकां शारांचें रूप आयलां तांकां रु-अर्बन अशी व्याख्या आतां तयार जाल्या. ह्या प्रकल्पांक टीसीपी आनी पीडीएन मान्यताय दिले उपरांत पंचायत तांकां परवनागी दिता. देखून वाहक क्षमताय तपासपा खातीर आमचे कडेन कसलीच यंत्रणा ना अशी जाप पंचायत मंत्री माॅवीन गुदिन्हो हांणी दिली.
जेन्ना मेगा प्रकल्पाचो विशय येता तेन्ना ग्रामसभेंत तो विशय मांडून लोक तांचे आड विरोध करपाक शकतात. ह्या प्रकल्पा आडचो विरोधकांचो थाराव समंत केले उपरांत ह्या प्रकल्पांक गांवांत येवपाक पंचायत न्हयकार दिवंक शकता.
ग्रामसभा एकलीच हे विशींचे निर्णय घेवपाक शकतात. एकदां प्रकल्पांक पर्यावरण, टीसीपी आनी हेर गरजेचे दाखले मेळ्ळे उपरांत तांकां आडावपा खातीर ग्रामसभेंत कसलो कायदो आसा. पंचायत सद्या पोस्ट ऑफीस जावन उरल्या. दाखले दाखयल्यार परवाने मेळटात देखून पंचायत राज कायद्यांत सुधारणा हाडप गरजेची अशें कार्लोस फेरेरा हांणी मागलें.
मेगा प्रकल्पांक लागून मुळाव्या साधन सुविधांचेर परिणाम जावचो न्हय हे खातीर समिती तयार करपाचो विचार आसा. ही समिती मेगा प्रकल्पां विशीं सरकाराक आपली सुचोवणी दितले. तशेंच वाहक क्षमतायेचेर आमी अभ्यास करतले. मुख्यमंत्र्यां वांगडा चर्चा करून हे विशीं प्रक्रिया सुरू करतले अशें उतर पंचायत मंत्री माॅवीन गुदिन्हो हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
