भांगरभूंय | प्रतिनिधी
पणजीः गोंयच्या पंचायत वाठारांतल्या वाहक तांकी विशीं मुख्यमंत्र्याकडेन उलोवन अभ्यास करतले. मुळावो साधन सुविधांचो उणाव जावचो न्हय म्हण मेगा प्रकल्पां खातीर यंत्रणां थारावपा खातीर समिती गठीत करपाचो सरकाराचो विचार आसा, अशें पंचायत मंत्री मावीन गुदीन्हो हांणी सांगलें.
गोंयच्या गांवगिर्या वाठारांत मेगा प्रकल्प येवन गांवाचो पुराय नकासो बदल्ला. रस्ते, सुवातो आनी उदक सारिकिल्ल्यो गरजेच्यो गजाली लक्षांत घेनासतना हे प्रकल्प आयल्यात. देखून मुळाव्या सुविधांचो सांबाळ करपा खातीर पंचायत राज कायद्यांत सुदारणा करुन सरकार वाहक तांकीचें विश्लेशण करतले, असो प्रस्न हळदणचे आमदार कार्लुस फेरेरा हांणी केलो.
गांवगिरे वाठार जांकां शारांचें रुप आयलां तांकां रु-अर्बन अशी व्याख्या आतां तयार जाल्या. ह्या प्रकल्पांक टीसीपी आनी पिडीएन मान्यताय दिले उपरांत पंचायत तांकां परवनागी दिता. देखून वाहक क्षमता तपासपा खातीर आमचे कडेन कसलींच यंत्रणां ना, अशी जाप पंचायत मंत्री मावीन गुदीन्हो हांणी दिली.
जेन्ना मेगा प्रकल्पाचो विशय येता तेन्ना ग्रामसभेंत तो विशय मांडून लोक तांचे आड विरोध करपाक शकतात. ह्या प्रकल्पाआडचो विरोधाचो थाराव समंत केले उपरांत ह्या प्रकल्पांक गांवांत येवपाक पंचायत न्हयकार दिवंक शकता. ग्राम सभा एकटीच हे विशींचे निर्णय घेवपाक शकता. एकदां प्रकल्पांक पर्यावरण, टीसीपी आनी हेर गरजेचे दाखले मेळ्ळे उपरांत तांकां आडोवपा खातीर ग्राम सभेंत कसलो कायदो आसा. पंचायत सद्या पोस्ट ऑफीस जावन रावल्यात. दाखले दाखयल्यार परवाने मेळटात देखून पंचायत राज कायद्यांत सुदारणा हाडप गरजेचें अशें कार्लुस हांणी मागलें.
मेगा प्रकल्पांक लागून मुळावे साधन सुविधांचेर परिणाम जावचो न्हय हे खातीर समिती तयार करपाचो विचार आसा. ही समिती मेगा प्रकल्पां विशी सरकाराक आपली सुचोवणी दितले. तशेंच वाहक क्षमतेचेर आमी अभ्यास करतले. मुख्यमंत्र्या वांगडा चर्चा करुन हे विशीं प्रक्रीया सुरू करतले, अशें उतर मंत्री गुदीन्हो हांणी दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
