भांगरभूंय | प्रतिनिधी
पणजी : कांदोळे आनी कळंगूटे वाठारांतल्या तीन बेकायदेशीर कॅसिनोंचेर गोंय पुलिसांच्या गुन्यांव फांट्यान मंगळारा रातीं उसरां कारवाय केली. हे कारवाये मजगतीं ९ जाणांक अटक केल्या. सुमार ३५ लाख रुपयांचे जुगाराचें सामान जप्त केलां.
ही कारवाय कॅसिनो गोल्ड (सिकेरी, कांदोळे), कॅसिनो ऍटलांटीज (कळंगूटे) आनी कॅसिनो फिनिक्स (साळप्यां, कांदोळे) हांगा केली. ‘पप्पीज कॅसिनो गोल्ड’ हांगा ‘अंदर-बाहर’ नांवाचो लायव्ह कार्ड गेम खेळटा अशी म्हायती मेळिल्ली. थंय पुलिसांनी टेबल, ५२ कार्डां, ६ ल्हान आनी १ मध्यम आकाराचो डिस्प्ले स्क्रीन, चिप फ्लोट, शफलर शू आनी हेर उपकरणां असो वट्ट ३५ लाख रुपयांचो माल जप्त केलो.
अटक जाल्ल्यां मदीं नरेशकुमार चौधरी (बिहार) कुनाल निहार जांबुसरिया (मुंबय) अरविंदर सिंग (दिल्ली) दिनेश डोडेजा (ठाणे), रामचंद्र यलप्पा (बंगळुरू), वेंकटेश राव (मैसूर) किरणकुमार जी.आर. (हासन, कर्नाटक) श्रीनिवास सी.एन. (बंगळुरू ग्रामीण), मदनकुमार रामकृष्णप्पा (बंगळुरू) साहिल बापू सावंत (मांद्रें, पेडणें) (डीलर), क्लिफोर्ड एफ. मेंडोंसा (रायबंदर, गोंय) (शिफ्ट मॅनेजर) हांचो आसपाव आसा. तांकां जामीनाचेर सोडले.
कालूच आमदार विजय सरदेसाय हांणी हो मुद्दो सभाघरांत मांडिल्लो आनी अशा प्रकारांचेर धडक कारवाय करपाची मागणी केल्ली. सरदेसाय हांणी काल सांजेवेळार ट्विटर हँडलार एक व्हिडिओ पोस्ट केलो. तांचे टिमीन १५ जुलयाक कॅसिनो गोल्ड, २७ जुलयाक कॅसिनोे ऍटलांटिज आनी ३ ऑगस्टाक फिनिक्स कॅसिनोंत स्टिंग ऑपरेशन राबयलें. ह्या व्हिडिओंत संबंदीत कॅसिनोंत मशीनाच्या जाग्यार हातान (मॅन्यूअली) हो जुगार खेळपी बेकायदो लायव्ह गेमिंगचे स्पश्ट पुरावे दिसून आयले. गुन्यांव फांट्याचो तपास सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
