भांगरभूंय | प्रतिनिधी
पणजीः सुण्यांचें वासीनीकरण आनी निर्बीजकरण करपाक पंचायत तशेंच पालिके कडल्यान सहकार्य मेळना. हे खातीर आमी तांकां वर्ल्डवायड व्हेटेनरी सर्विसेस (ड्ब्ल्यूव्हीएस) ह्या एनजीओ वांगडा कबलात करपाक सांगलां. गोंय हें रेबीस मुक्त आसा, अशें पशु संवर्धन मंत्री निळकंठ हळर्णकार हांणी सांगलें.
शिवोलेची आमदार डिलायला लोबो हांणी रस्ताद सुण्यांचो लोकांचेर जावपी हल्ल्यांचो विशय सभाघरांत मांडलो.
सरकार वासिनीकरण आनी निर्बीजीकरण करता अशें सांगता, मात दिसान दिस रस्ताद सुणे चावपाच्यो घडणुको वाडत आसात. ह्या वर्सा जानेवारी ते आतां मेरेन १७८१ रस्ताद सुणीं चावपाच्यो घडणुको घडल्यात. दिसाक सरासरी ५७ सुणे चावपाच्यो घडणुको घडटात. दर वर्सा सुणे चावपाचे घडणुकेंत वाड कित्याक जाता हे विशींचो अभ्यास सरकारान केला कितें, असो प्रस्न लोबो हिणें विचारलो.
रस्त्याद सुण्यांचें निर्बीजीकरण आनी वासीनीकरण करून घेवपाची जापसालादरी ही पंचायत आनी पालिकांची आसा. मात चडश्यो पालिका आनी पंचायती तें करपाक फुडें सरनात. २ मार्चाक केंद्रान केल्ले सुण्यांचे जनगणने प्रमाण राज्यांत ३,५०० रस्ताद सुणीं आसात. हांचें निर्बीजीकरण आनी वासिनीकरण करपा खातीर आमकां पालिका आनी पंचायतीचें सहकार्य जाय आनी देखून तांकां ड्ब्ल्यूव्हीएस ह्या एनजीओ वांगडा कबलात करपांक सांगलां, अशी म्हायती हळर्णकार हांणी दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
