पावसाचो उटंगार : म्हापश्यां, पेडणें उदका पोंदां
भांगरभूंय | प्रतिनिधी
पणजी: ऑगस्टाचे सुरवातेक फाटले दोन दीस पावसान कांय प्रमाणांत विसव घेतिल्लो. मात काल रातच्यान पावसाचो नेट बरोच वाडलो. ह्या पावसाचो उत्तर गोंयच्या कांय वाठारांक फटको बसलो.
हवामान खात्यान दिल्ले म्हायती प्रमाण, गोंयांत फाटल्या २४ वरांनी सरासरी १.३१ इंच पावसाची नोंद जाल्या. जाल्यार १ जून ते ६ ऑगस्ट मेरेन सरासरी ८०.२८ इंच पावस झडलो. ह्या २४ वरांत म्हापश्यां ४.७६ इंच पावसाची नोंद जाली.
म्हापश्यां, पेडण्यां बुडलें
कालच्यान झडपी पावसाक लागून म्हापश्यां हुंवाराची स्थिती निर्माण जाली. हाका लागून लोकांक बरेच त्रास सोंसचे पडले. म्हापश्यां बाजार उदका पोंदाक गेलो. तशेंच थियेच्या रेल्वेस्टेशन वाठारांतूय सगल्याक उदक सांठून उरिल्लें दिसलें. म्हापश्यां शारांतल्या रस्त्यांचेर उदक धिपरां मेरेन पाविल्ल्यान लोक वाट सोदीत आपलीं वाहनां उदकांतल्यान धुकलतना दिसले.
तशेंच पेडणें म्हालांतल्या मोरजी, पेडणें शार वाठार, हरमल आनी गांवगिर्या वाठारांतलेय रस्ते उदका पोंदा गेले. पावसाक लागून आयज सकाळीं कामाक भायर सरपी लोकांक बरेच त्रास सोंसचे पडले. मान्सून पयलींच्या कामांत घाळपणां केल्ल्यान लोकांनी हे विशीं तिडक उक्तायल्या.
पर्वरी कोंयडी
मजगती, आयज पर्वरी वाठारांत सकाळीं णवांकसुमार येरादारीची कोंयडी जाली. ती इकरा मेरेन सुटूंक नाशिल्ली. दामियान दी गोवा वाठारांत सकाळीं ९.३० क पाविल्ल्या गाडयांक सचिवालया कडेन पावता म्हणसर १०.३० वरां जालीं.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
