भांगरभूंय | प्रतिनिधी
पणजीः एसटी आरक्षण वेल्यान मुख्यमंत्री आनी विरोधकां मदीं पेटलें. एसटी आरक्षण विधेयक दोन फावटी संसदेंत आयलें. मात ताका कॉंग्रेस आनी हेरांनी विरोध करून तें मान्य करुंक दिवंक ना, अशें मुख्यमंत्री डॉ. प्रमोद सावंत हांणी सांगलें. हाचेर विरोधी पक्ष फुडारी युरी आलेमाव हांणी आक्षेप घेवन बोवाळ घालपाक सुरवात केली.
आदिवासी समुदायक विधानसभेंत राजकी आरक्षण केन्ना मेळटलें असो प्रस्न सांतआंन्द्रेचे आमदार विरेश बोरकार हांणी विचारून, सरकार आदिवासी समुदायाचेर अन्याय करीत आयलां असो आरोप केलो. हाचेर जाप दितना मुख्यमंत्र्यान सांगलें, भाजप सरकारान २०१२ वर्सा आदिवासींक तांचे हक्क दिवन तांकां खरो न्याय दिला. आदिवासी खातीरच्यो सगल्यो येवजण्यो आनी हक्क सरकारान दिल्यात. उरलो तो विशय फक्त राजकी आरक्षणाचो. हे खातीर आमी विधानसभेंत थाराव मंजूर केला आनी हो थाराव आमी केंद्रा कडेन गृहमंत्री अमित शहा हांकां दिला. राज्यसभा आनी लोकसभेंत हो थाराव मंजूर जाले उपरांत राजकी आरक्षण अस्तित्वांत येतलें, अशें मुख्यमंत्र्यान सांगलें.
एसटी आरक्षण विधेयक संसदेंत दोन फावट आयलां. मात दोनूय फावटीं कॉंग्रेस आनी विरोधकांनी बोवाळ घालून हें विधेयक संमत करपाक दिवंक ना. आरक्षण विधेयक मंजूर करपाक आडखळ हाडपी कॉंग्रेस हें खरें कारण आसा, असो थोमणो मुख्यमंत्र्यानी मारलो.
हें आयकून विरोधी पक्ष फुडारी युरी आलेमाव ओगी रावंक नात. सभापती रमेश तवडकार हांणी मुख्यमंत्र्याची बाजू घेवन कॉंग्रेसीन दोन फावट विरोध केला अशें सांगलें. जर कॉंग्रेसीन घाल्ल्या बोवाळाक लागून विधेयक आडखळिल्लें जाल्यार विरोधकांक भायर काडून विधेयक संमत करुं येतालें. ह्यान पयलीं कितलींशींच विधेयकां विरोधकांक भायर काडून संमत केल्यांत, असो आरोप आलेमाव हांणी केलो.
सद्या आरक्षण हो विशय केंद्राचे कक्षेंत आसा. जेन्ना लोकसभा आनी राज्यसभेंत हें विधेयक संमत जातलें तेन्नाच एसटी आरक्षण लागू जातलें, अशें मुख्यमंत्र्यान सांगलें.
मजगती, मुख्यमंत्र्यान कॉंग्रेसी आड केल्ल्या आरोपांचेर विरोधी पक्ष फुडारी एकलेच झगडटाले. ताचे वांगडी हळदणचे आमदार कार्लुस फेरेरा आनी केपेंचे आमदार एल्टन डिकोस्टा गैरहजर आशिल्ले. फक्त विरोधक म्हण सांत आंन्द्रेचे आमदार विरेश बोरकार हांची साथ तांकां मेळ्ळी.
१९ डिसेंबरा पयलीं रान हक्क दावे
सरकारान आदिवासी समुदायांक सुमार तीन हजार रान हक्काच्यो सनदी दिल्यात. १ हजार अर्ज रद्द जाल्यात. उरिल्ले ६ हजार रान हक्क दाव्यांच्यो सनदी १९ डिसेंबर पयलीं दितले, अशी जाप मुख्यमंत्री सावंत हांणीआलेमाव हांचे जापेक दिली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
