भांगरभूंय | प्रतिनिधी
पणजीः बरोच तेंप जालो अजून आयआयटी प्रकल्पा खातीर गोंयांत सासणाची सुवात मेळना. आयआयटी खंय उबारप हे खातीर सुवातेचो सोद घेवप चालू आसा. अजून मेरेन आयआयटी खातीर सुवात निश्चीत जांवक ना. सद्या आयआयटीत तीन अभ्यासक्रम चालीक लायल्यात अशी म्हायती शिक्षण मंत्री ह्या नात्यान मुख्यमंत्री डॉ. प्रमोद सावंत हांणी दिली.
केपेंचे आमदार एल्टन डिकॉस्टा हांणी विधानसभेच्या पटलार विचारिल्ल्या प्रस्नाक लेखी जापेंत शिक्षण मंत्री तशेंच मुख्यमंत्री डॉ. प्रमोद सावंत हांणी जाप दिली.
आयआयटीचें सासणाचें कॅप्मस उबारपा खातीर योग्य अशी सुवात सोदपाची प्रक्रिया चालू आसा. ह्या प्रकल्पा खातीर योग्य अशी सुवात आमी सोदून दितले असो विस्वास आमकां आसा. सद्या खूबश्या सुवातांचो विचार चालू आसा अशें मुख्यमंत्र्यांनी जापेंत म्हणलें.
एकदां गोंय सरकारान केंद्र सरकाराक सुवात दिले उपरांत शिक्षण मंत्रायल आयआयटीचें काम केन्ना सुरू करप आनी केन्ना पुराय करप हे विशींचो निर्णय घेतलें.
सद्या गोंयात आयआयटी 2016 सावन कार्यान्वीत आसा. पूण ताच्या कॅम्पसा खातीर सासणाची सुवात ना. गोंय आयआयटीत बी. टॅक, एम. टॅक आनी पीएचडी अभ्यासक्रम सुरू आसात.
बी. टॅक अभ्यासक्रमा खाला कंम्प्युटर विज्ञान आनी आभियांत्रिकी, इलेक्ट्रीकल अभियांत्रिकी, मॅकानीकल अभियांत्रिकी, गणीत आनी संगणीकय ज्ञान विशय शिकयतात.
एम टॅक अभ्यासक्रमा खाला कंम्प्युटर विज्ञान आनी आभियांत्रिकी, इलेक्ट्रीकल अभियांत्रिकी मॅकानीकल आभियांत्रिकी विशय शिकयतात.
पीएचडी अभ्यासक्रमा खाला रसायन शास्त्र, गणीत, भौतीकशास्त्र, कंम्प्युटर विज्ञान आनी आभियांत्रिकी, इलेक्ट्रीकल अभियांत्रिकी, मॅकानीकल आभियांत्रिकी, अर्थशास्त्र, भाशा आनी साहित्य, रसायन आनी मॅटेरीयल अभियांत्रिकी विशय शिकयतात अशें लेखी जापेंत मुख्यमंत्री डॉ. प्रमोद सावंत हांणी म्हणलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
