भांगरभूंय | प्रतिनिधी
पणजी: बंचड केबल यंत्रणेचेर जाल्लो खर्च फुकट गेला. हाची चवकशी करपाची मागणी सत्ताधारी आमदार मायकल लोबो आनी संकल्प आमोणकार हांणी केली. 145 कोटीं पैकीं कितले पयशे वसूल जातले ते सांगपाची मागणी आमदार मायकल लोबो हांणी केली. सत्ताधारी तशेंच विरोधी आमदारांनी मुखेल वीज अभियंते स्टिफन फर्नांडीस हांच्या कामाची तोखणाय केली, मात कंत्राटदारांचेर फोग काडलो.
सभाघरांत सोमारा वीज खात्याच्या मागण्यांचेर चर्चा जाली. विरोधी आमदारां सयत सत्ताधारी आमदारांनी कंत्राटदारांचेर टिका केली. रस्तो फोडून काम पुराय जाले उपरांत कंत्राटदार परतून रस्तो सारको करिनात अशी कागाळ आमदारांनी मांडली.
दिवचलचे आमदार डॉ. चंद्रकांत शेटये हांणी कंत्राटदारांच्या कामा विशीं कागाळ मांडली. भुंयगत विजेचें काम करपी कंत्राटदार रस्तो फोडून काम करतात. काम पुराय जाले उपरांत रस्तो आसा तसो ते करिनात. हाका लागून येरादारीक आडखळ जाता. मुखेल वीज अभियंत्यां सयत हेर अभियंते बरो वावर करतात मात कंत्राटदार कोणाचे बरी मागपी आसात तें कळना, अशें उलोवप केलें.
बंचड केबल यंत्रणेचेर 145 कोटी रुपया खर्च जाल्यात. हाचे पैकीं 110 कोटी कंत्राटदाराक फारीक जाल्यात. ही यंत्रणा अपेशी थारल्या. कंत्राटदाराची चवकशी जावन 110 कोटीं पैकीं कितले पयशे वसूल जातले हें स्पश्ट जावपाक जाय. सिकेरी, बागा, कळंगूट वाठारांत सगल्यांत चड हॉटेलां आसात. ह्या वाठारांतल्यान सगल्यांत चड येणावळ वीज खात्याक मेळटा.
पीएम सूर्यघर येवजणे वरवीं सोलर पॅनल बसोवपाची सक्ती हॉटेलांकूय करपाक जाय. हाका लागून विजेचो वापर उणो जातलो अशी सुचोवणी मायकल लोबो हांणी केली.
आमदार संकल्प आमोणकार हांणी लेगीत बंचड केबल यंत्रणेची चवकशी करपाची मागणी केली. सरकारान समितीची नेमणूक केल्ली, मात समितीची बसकाच जावंक ना. चवकशेची स्थिती किदें आसा? असो प्रस्न तांणी केलो.
वीज खात्याचे अभियंते बरो वावर करतात, मात खंयचें काम खंयचो कंत्राटदार करता तेंच कळना. काम खंयचो कंत्राटदार करता तें थळाव्या आमदाराक कळपाची गरज आसा अशी मागणी आमदार राजेश फळदेसाय हांणी केली.
पर्येंच्यो आमदार देविया राणे हांणी भुंयगत विजेचीं कामां पुराय करपा खातीर वीज मंत्र्यांचे उपकार मानले.
मजगतीं, आमदार कार्लोस फेरेरा, गोविंद गावडे, अालेक्स रेजिनाल्ड, प्रवीण आर्लेकार, केदार नायक, डिलायला लोबो, वेंझी व्हिएगश हांचीं भाशणां जालीं.
सुदिन ढवळीकार हे भाजपच्या
येसाची गुरुकिल्ली : एल्टन डिकॉस्टा
सुदिन ढवळीकार हे भाजपच्या येसाची गुरुकिल्ली आसा. हाचे खातीर वीज खात्या खातीर भरीव निधीची तजवीज केल्या. केपें मतदारसंंघांत वीज खात्यान खूब वावर केला. मुखेल वीज अभियंत्यां सयत हेर अभियंत्यांची तांणी तोखणाय केली.
बंचड केबल चवकशी वरवीं आदल्या
वीज मंत्र्यांच्या चवकशेची मागणी
बंचड केबल वीज यंत्रणेच्या चवकशेची मागणी करतना आमदार संकल्प आमोणकार हे आदल्या वीज मंत्र्यांच्या चवकशेची मागणी करतात. ही मागणी करपा खातीर तांकां हांव परबीं दितां. मंत्रीपद मेळ मेरेन ते ही मागणी करीत रावतले अशें गोवा फॉरवर्डाचे आमदार विजय सरदेसाय हांणी चर्चे वेळार सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
