भांगरभूंय | प्रतिनिधी
कोवीड काळांतलो हिशेब सादर करूंक नाशिल्ल्याचो आरोप
म्हापशें: देव बोडगेश्वर संस्थानाची सदची साबार बसका बेकायदो आसा. कोवीड काळांतलो हिशेब आनी जमा खर्च सभे मुखार सादर करूंक नाशिल्ल्याचो गंभीर आरोप केल्ल्यान ही सभा वादळी थारली. वांगड्यांक समाधानकारक जापो मेळूंक नाशिल्ल्यान आनी विरोधाक सामकार वचत ही सभा अध्यक्ष आनंद भाईडकार हांकां तहकूब करची पडली.
आयतारा (31 जुलय) जाल्ले सभेंत आदले अध्यक्ष अॅड. महेश राणे, आदले अध्यक्ष अॅड. सुभाष नार्वेंकार, बाळू फडके, अशोक गोवेकार, शशिकांत कांदोळकार, नरेश तिवरेंकार, नंदकिशोर शिरगांवकार, संजय बर्डे, एकनाथ म्हापशेंकार हांणी देवस्थानाच्या चुकीच्या कारभाराचेर टिका करून खूबशे गैरवेव्हार जाल्ल्याचो आरोप केलो.
ही सभा बेकायदो आशिल्ल्यान ती ताकतिकेन रद्द करची अशी नेटाची मागणी अॅड. महेशन राणेन केली. हे सभेंत देवळा कुशीचे शेतकारूय आपले जमनींत देवस्थान समितीन बेकायदो अतिक्रमण केल्ल्याचो आरोप करीत बोवाळ घालपाचो यत्न केलो. ताका लागून अध्यक्षाक सभा तहकूब केले बगर आनीक दुसरो पर्याय नाशिल्लो.
हे विशीं अध्यक्ष आनंद भाईडकार हांचे कडेन संपर्क सादलो तेन्ना तांणी म्हणलें, सगले सोपस्कार कायदेशीरपणान पुराय करुनूच सभेचें आयोजन केल्लें. 2019-20, 2020-21 वर्साचो जमाखर्च आनी हिशेब लिखीत स्वरुपांत सादर केलो. पूण, वांगड्यांक तो मान्य नाशिल्लो. ताका लागून बोवाळ जालो. आपले आड घोशणा दिल्यो अशें तांणी म्हणलें.
मजगतीं, नामनेचे तशेंच जागृत देव बोडगेश्वराच्या सभाघरांत असो बोवाळ घालप बरोबर दिसना. देवस्थान समितीन प्रामाणीकपणान काम करून, सभासदांचो विस्वास मेळोवन आनी देवस्थानाची प्रतिश्ठा उंचावपाचें काम करूंक जाय. अशा आरोप-प्रत्यारोपाक लागून देवस्थानाचें नांव पेड्डेर जायत आशिल्ल्याचें म्हापशेंकारान म्हणलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
