भांगरभूंय | प्रतिनिधी
वीज खात्याची येणावळ 11.5 टक्क्यांनी वाडली
पणजी: गोंयान 2030 मेरेन 150 मेगावॉट सौर वीज निर्मितीचें जें उद्दिश्ट दवरलां तें सरकार 2027 मेरेनूच पुराय करतलें अशें वीज मंत्री सुदिन ढवळीकार हांणी सांगलें. आतां मेरेन पीएम सूर्यघर येवजणे खाला 5157 सोलर पॅनल जोडण्या खातीर 15.07 कोटींचें अनुदान दिलां. 76.99 मेगावॉट तांकयेचे सोलर पॅनल बसयल्यात. हातूंतल्यान 72.5 दशलक्ष युनीट विजेची निर्मिती जाता.
वीज खात्याच्या मागण्यांक चर्चे उपरांत मान्यताय दिली. चर्चेक जाप दितना वीज मंत्री सुदिन ढवळीकार हांणी ही म्हायती दिली. गोंयांत विजेची मागणी सरासरी 6 टक्क्यांनी वाडत आसून अंदूं 2025 – 26 वर्सा खातीर पीक आवराक विजेची मागणी 815 मेगावॉट आसा. वीज खात्याची येणावळ 2024 – 25 वर्सा 11.5 टक्क्यांनी वाडली. तशेंच अर्थसंकल्पाच्या 97.35 टक्के निधीचो विनियोग जाला. आतां मेरेन 33 केव्ही, 11 केव्ही मेळून 8039 किमि वीज लायन भुंयगत करपाचो वावर (अंडरग्रावंड) सुरू आसा.
आतां मेरेन सरकारान 54 सरकारी इमारतींचेर सोलर पॅनल बसयल्यात. पीएम कुसूम येवजणे खाला शेतकारांक 700 सोलर पंप दिवपाची निविदा जारी जाल्या.
इलेक्ट्रीक गाडयांचो आंकडो गोंयांत वाडत आसा. इलेक्ट्रीक वाहनांक अनुदान दिवपी येवजणे खाला 2294 जाणांक दुचाकी खातीर 3 कोटी 42 लाख 10 हजारांचें अनुदान दिलां. तीन चाकी गाडयां खातीर 1 कोटी 56 लाखांचें जाल्यार चार चाकी गाडयां खातीर 5 कोटी 86 लाखांचे अनुदान दिलां.
कोळशा वेल्या ग्रीन सेसाचो विशय अर्थीक फाटो हाताळटा. ग्रीन सेसाची थकबाकी 4500 कोटी आसत जाल्यार ताची वसुली जातली. मुख्यमंत्र्यां कडेन चर्चा करून हो विशय सुटावो जातलो, अशें वीज मंत्री सुदिन ढवळीकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
