भांगरभूंय | प्रतिनिधी
राहुल गांधी हे सद्या तांच्या बोल्सांत आशिल्ल्या ‘अणू बॉमा’चो स्फोट केन्ना घडोवन हाडटले हाची वाट सगलो देश पळयता. अमेरिकेचे राष्ट्राध्यक्ष डॉनाल्ड ट्रंप हेवूय घडये हो स्फोट जावचो न्हय हे खातीर हस्तक्षेप करूंक शकतले वा तांणी तो करचो अशें राहुल गांधी हांकां अपेक्षीत आसुये. ते खातीर घडये ते स्फोट करपा खातीर राविल्लेय आसुये. नाजाल्यार वेंचणूक आयोगाक सरळ अणुस्फोट करपाची धमकी दिले उपरांतूय ते खातीर म्हूर्त सोदपाचें कसलेंच कारण ना. आमच्या ट्रंप सायबांक शांतताये खातीरचो नोबॅल पुरस्कर इतलो बुड्डूंक लागला की ताचेर उतारो म्हूण हांगाय ते हस्तक्षेप करचे नात अशें म्हणूंक येवचें ना. काँग्रेस आनी ह्या पक्षाचे राहुल गांधी, मल्लिकार्जून खर्गे, पी. चिदंबरम, जयराम रमेश बी फुडारी सद्या प्रधानमंत्री नरेंद्र मोदी आसूं वा वेंचणूक आयोगा सारक्या संविधानीक संस्थां आड जी तर्कशुन्य विधानां करतात तें पळयत जाल्यार राजकी निरशेवणेंतल्यान जाल्ली तांची निरशेवणी अवस्था कोणाच्याय लक्षांत येवची. लोकसभेंतले विरोधी पक्ष फुडारी हे घटनात्मक पद मिरोवपी राहुल गांधी हांणी तर ह्या पदाची प्रतिश्ठा मातयेभरवण करपाक आनीक कांयच अशें दवरिल्लें ना. आपल्या नाकारतेपणाचो घडो प्रधानमंत्री वा वेंचणूक आयोगाचे तकलेर फोडटा तें पळयतना तांचें सद्याचें दुबळेंपण स्पश्ट दिसून येता. राहुल गांधी हांणी केल्ले ‘अणुस्फोट’ हाचे पलयींय देशान पळयल्यात. ताका लागून ते सद्या ज्या अॅटम बॉमाची भाशा करतात त्या स्फोटांत ते स्वताच बळी पडले जाल्यार ताचे कोणाक व्हडलेशें अजाप दिसपा सारकें कारण ना.
बिहारांत वर्स सोंपता म्हणसर जावपी विधानसभा वेंचणुकेचे फाटभुंयेर विरोधी काँग्रेस आनी हेर इश्टपक्ष भाजपाच्या विरोधांत वातावरण निर्मिती करपाचो यत्न करतात आसत जाल्यार ताका कोणे आक्षेप घेवपाचो प्रस्नूच उप्रासना. पूण तशें करतना जो मार्ग आपणायतात तो खूब म्हत्वाचो थारता. काँग्रेस आनी राष्ट्रीय जनता दला सारक्या तांच्या इश्ट पक्षांनी ते खातीर जो मार्ग आपणाला तो पळयत जाल्यार ताचें समर्थन करूंक येवचें ना. उरफाटें राजकी निरशेवणेंतल्यानूच हें सगलें करतात असोच ठपको ताचेर बसलो जाल्यार तें चुकीचें थारचें ना. प्रधानमंत्री नरेंद्र मोदी हे राहुल गांधी हांचे राजकी दुस्मान जरूर आसात, पूण तांचेर व्यक्तीशा आरोप करतना ते आमच्या देशाचे प्रधानमंत्री आसात हाची याद तांकां जावंक जाय. तरी आसतना एकेरीचेर येवन तांणी तांची जी बदनामी चलयल्या ताका पाकिस्तानांत एक फावटी ताळयो मेळटात आसतल्यो पूण आमच्या देशांत मात ही बदनामी खपोवन घेवचे नात हाचे इल्लें तरी भान राहुल गांधी हांणी दवरूंक जाय आशिल्लें, पूण तशें जायना. राहुल गांधी आयज देशांत फकांडांचो विशय थारपाक तेच एक कारण आसात, आनी हाकाच लागून काँग्रेसीचो पांय सद्याच्या काळांत आनीक खोलांत वचूंक शकता. लोकसभेंतूय राहुल गांधी हांणी वेंचणूक आयोगाचेर जे गंभीर आरोप केल्यात आनी ह्या संविधानीक संस्थेक संवसारांत सगले कडेन बदनाम करपा खातीर सगल्यो मर्यादा हुंपिल्ल्यो पळोवन राजकी निरशेवणेंतल्यान ते कितले हताश जाल्यात हेंच दिसून येता.
ईव्हीम आसूं वा वेंचणूक आयोगा कडल्यान जावपी मतदार वळेऱ्यांची पडटाळणी, सर्वोच्च न्यायालयांतूय विरोधकांनी घेतिल्ले आक्षेप जंय तिगले नात उपरांतूय आपले तुणतुणें वाजयत रावप कितले मेरेन योग्य थारतलें हाचो विचार काँग्रेसीच्या फुडाऱ्यांनी करूंक जाय आशिल्लो. पूण ह्या पक्षांत सगले वटेन विचार करपी आतां एकूय फुडारी उरिल्लो ना ताचेंच हें संकेत आसात. वेंचणूक आयोगा कडेन थेट चर्चा करून आपले मुद्दे मुखार मांडपाक कोणेच आडायिल्लें नासतनाय जें हें सगलें चल्लां ताचे फाटल्यान निश्चीतपणान एक खेळी आसली तरी तातूंतल्यान विरोधकांक कितेंय साध्य करूं येतलें अशें दिसता आसत जाल्यार तांकां त्या भ्रमांतल्यान भायर पडून वास्तवाक सामकार वच्चें पडटलें. वेंचणूक आयोगाचेर भाजपा खातीर मतांची चोरी करीत आशिल्ल्याचो थेट आरोप केले उपरांत राहुल गांधी आड आयोग कसली कारवाय करतलो हाचीय सगले वाट पळयतात. पूण सद्या तरी आयोगान अशा आरोपां कडेन आडनदर करपाचोच सल्लो दिल्लो दिसता. ‘मतचोरी’चे आरोप निराधार आसून अशा बेजापसालदार टिपण्यां कडेन आडनदर करात अशें आयोगान म्हणिल्लें आसलें तरी तांच्या अशा बेजापसालदारा खातीर अजून कितेंय कारवाय करूंक मेळटली काय कितें हाचीय पारखणी आयोगाक करची पडटली. सांसद म्हूण मेळिल्ल्या अधिकारांचे कवच बाळगून राहुल गांधी आरोप करीत आसातूच, पूण आपूण वेंचणूक आयोगा परस श्रेश्ठ आशिल्ल्याचो जो समज तांचो जाल्लो आसत जाल्यार तोवूय पयस करपाची गरज आसा.
ऑपरेशन ‘सिंदूर’ ह्या विशयाचेर फाटल्या सप्तकांत संसदेच्या दोनूय सभाघरांनी जाल्ले चर्चे वेळार काँग्रेसीच्या पी चिदंबरम सारक्या ज्येश्ठ फुडाऱ्यान जो पवित्रो आपणायलो वा जें अक्कल घाणाक दवरून उलयलो तें पळयत जाल्यार अपरिपक्व राहुल गांधी कडल्यान तरी कसली अपेक्षा बाळगुची. देशाचे गृह मंत्री, अर्थ मंत्री हीं पदां एका काळार भुशोवपी पी. चिदंबरम हांणी पहलगामांतल्या आतंकवादी हल्ल्यांत गुथिल्ल्यांचो ते पाकिस्तानी आशिल्ल्यााचो पुरावो सरकारा कडेन मागप ही तर शिमूच जाली. आपल्याच कर्तुबान ह्या पक्षाचे फुडारी जी फजेत करून घेतात तें पळयत जाल्यार राजकी निरशेवणेंतल्यानूच हें सगलें घडत आसा अशें म्हणपाक खूबशी सुवात आसा. आपल्या विधानाचो चुकीचो अर्थ लायला अशें आदवोगादाचे भाशेंत तांणी आपलो बचाव करपाचो यत्न केलो तरी तो मेरेन ते आपली इज्जत व्हगडावन बसल्यात. वट्ट चर्चे वेळार अशें दिसून येतालें की काँग्रेस आनी हेर कांय पक्षांचे फुडारी पाकिस्तानाचीच बाजू मांडीत आसात. आनी पाकिस्तानाचो ह्या हल्ल्यांत हात ना हेंच तांकां सांगपाचें आसा. निमाणें तांकां पाकिस्तानाक क्लीन चीट दिवन कोणाक खूश करपाचें आशिल्लें हो प्रस्न मात उरता. ‘सिंदूर’ कारवायेंत पाकिस्तानाचीं कितलीं विमानां आमच्या सैनिकांनी उडयलीं हें समजून घेवपा बदला आमची किलतीं विमानां उडयलीं हाची म्हायती मागपी विरोधी पक्ष फुडाऱ्यान तर एक वेगळोच ‘आदर्श’ घालून दिला. संसदेंतले चर्चेचो पांवडो इतलो तळाक गेलो की ताचें कोणाकूच पडून गेल्लें ना. राजकी निरशेवणेंतल्यान निरशेल्ल्या आनी काचाबूल जाल्ल्या काँग्रेस पक्षा कडल्यान संसदेंत आयचे परिस्थितींत हाचे परस आनीक अपेक्षा कोणूय करता आसत जाल्यार तें व्हडलें अजाप थारुये.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
