भांगरभूंय | प्रतिनिधी
सिमेंट काँक्रिटाचे पडटात कुडके; वास्को लोकां मदीं चर्चेचो विशय
वास्को: स्वातंत्र्य पथार एका विक्रेत्यान वास्को सप्ता निमतान पालिकेच्या असुरक्षीत इमारती पोंदा आपलें दुकान घालपा खातीर पत्र्याचें पाखें उबारिल्ल्यान वास्कोंत एक चर्चेचो विशय सुरू जाला.
स्वातंत्र्य पथार पालिकेच्या मालकीची इमारत आसा. ह्या इमारतीची दुर्दशा जाल्ल्यान तशेंच सिमेंट काँक्रिटाचे कुडके पडूंक लागिल्ल्यान ही इमारत असुरक्षीत म्हूण घोशीत केल्ली. ह्या इमारतीच्या सकयल्यान कोणेंच यो-वच करचे न्हय हे खातीर थंय बॅरिकेड्स उबारिल्ले. ताका लागून चलून वचप्यांक रस्त्या वयल्यान चलून वच्चें पडटालें. तशेंच वाहनचालकांक लेगीत आपलीं वाहनां थंय उबीं करूंक मेळनात.
आतां सप्ता निमतान एका विक्रेत्यान दुकान घालपा खातीर त्या इमारती पोंदा पत्र्याचें पाखें बांदला. ही सुवात असुरक्षीत आशिल्ल्यान थंय पालिकेन दुकानां दिवचीं न्हय अशें थारायिल्लें. ते प्रमाण थंय क्रमांक घालूंक नाशिल्ले. पूण त्या विक्रेत्यान थंय अवैधरितीन दुकान घालपाच्यो हालचाली चलयिल्ल्याची चर्चा सुरू जाल्या.
वास्को सप्ताचे फेरयेंत दुकान घालचे पयली पयलींच्या विक्रेत्यांक प्राधान्य दितात. जांचे कडेन हाचे पयलीं दुकानां घालपा संबंदी आनी परवानो शुल्क भरिल्ल्याच्यो पावती आसात तांकां तांचे पयलींचे सुवातेर दुकान घालपाक दितात. ताका लागून जांणी पयलीं चार-पांच दुकानां घालपा संबंदी परवाने घेतिल्ले, ते आतां थंय फाटल्या कांय वर्सां सावन दुकान घालिनात. पूण संबंदीत आपल्या नांवार ती दुकानां दुसऱ्यांक दिवन फायदो जोडीत आशिल्ल्याची चर्चा सुरू आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
