भांगरभूंय | प्रतिनिधी
पणजीः कला आनी संस्कृती संचालनालया वतीन दरवर्सा चवथी निमतान आयोजीत करपात येवपी राज्य पांवड्या वयली माटोळी आनी देखावो सजावट सर्त जाहीर केल्या. वैयक्तिक कुटुंबां खातीर माटोळी सजावट सर्त 29 ऑगस्ट ते 1 सप्टेंबर मेरेन आयोजीत करतले. जाल्यार देखावो सादरीकरण सर्त राज्यांतल्या नोंदणीकृत भौशीक गणेश उत्सव मंडळां खातीर 2 ते 6 सप्टेंबर मेरेन आयोजीत करतले. सर्तींच्या जैतिवंतांक प्रशस्तीपत्र आनी रोख इनामां दितले.
ह्या सर्तींचे अर्ज कला आनी संस्कृती संचालनालय, संस्कृती भवन पाटो, पणजी, (फोन नं. 0832-2404640/ 636/ 638), रवींद्र भवन मडगांव, रवींद्र भवन कुडचडें, रवींद्र भवन सांखळे, रवींद्र भवन बायणा – वास्को, रवींद्र भवन काणकोणां आनी राजीव गांधी कला मंदीर, फोंड्यां उपलब्ध आसात. अर्ज कला आनी संस्कृती संचालनालयाच्या www.artandculture.goagov.in ह्या संकेत थळाचेरुय उपलब्ध आसतले. पुराय भरिल्ले अर्ज 18 ऑगस्ट मेरेन कार्यालयीन वेळेत स्विकारतले. सर्तींचे नेम आनी हेर म्हायती अर्ज नमुन्यांत आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
