भांगरभूंय | प्रतिनिधी
ओबीसी खातीर वाडीव आरक्षणाचो निर्णय नवे जनगणने उपरांत
भांगरभूंय । प्रतिनिधी
पणजीः ओबीसी खातीर आरक्षणाची टक्केवारी वाडोवपाचेर तशेंच ओबीसींक आरक्षणाचो कोटा वाडोवन दिवपा विशींचो निर्णय 2027 जनगणने उपरांत घेतले. ओबीसी खातीर गोंय वैजकी महाविद्यालयांत क्लिनीकल सुवातींच्या आरक्षणा विशींचे परिपत्रक बेगीनूच उजवाडायतले, अशीं म्हायती मुख्यमंत्री डॉ. प्रमोद सावंत हांणी आयज दिली.
गोंयांत भंडारी समाज 60 टक्के इतलो आनी खारवी जातीचो व्हडलो वांटो हिंदू समाजा भितर आसा. देखून 27 टक्के आरक्षण हे खंयच्या आदाराचेर थारयिल्लें. हो 27 टक्के आंकडो सारको ना. ते भायर ओबीसी भितरच कोटा वाडोवन दिवपाची भंडारी समाजाची मागणी आसा. सरकार हातूंत केन्ना लक्ष घालतलें, असो प्रश्न फातोड्डेंचे आमदार विजय सरदेसाय हांणी केलो.
हाचेर जाप दितना मुख्यमंत्री डॉ. सावंत हांणी सांगलें, 2027 चे जनगणनेचो डाटा येतकच आमी हे विशीं विचार करतले. आमका सद्या अचूक आंकडो कितें तो खबर ना. हें विशीं सर्व्हे जातलो. सद्या उतर दिवप शक्य ना.
गोंय वैजकी हॉस्पिटलांत क्लिनीकल शाखेच्या अभ्यासक्रमांत अजून मेरेन ओबीसीं खातीर आरक्षण निश्चित करुंक ना. देखून सरकारान ओबीसींचेर व्हड अन्याय केलां, असो आरोप विरोधी पक्ष फुडारी युरी आलेमांव हांणी केलो.
हे विशीं जाप दितना मुख्यमंत्र्यांन सांगलें, सुभाष शिरोडकार आनी तांचो पंगड हे विशीं फाटपुरवण करता आनी बेगीनूच हो विशय सुटावो जातलो. फुडल्या सप्तका मेरेन क्लिनीकल अभ्यासक्रमांत आरक्षण दिवपा विशींचे परिपत्रक उजवाडाक हाडटले, अशें आश्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
