भांगरभूंय | प्रतिनिधी
पणजीः टेलिग्रामाचेर टास्क फ्रॉड वरवीं नोंकरी दिवपाचें हांयस दाखोवन एका तरणाट्यान जोगेश्वरींत रावपी एकल्याक 6 लाख रुपयांची तोपी घाली. पुलिसांनी गुन्यांव नोंद करून तपासाक सुरवात केली तेन्ना दुबावीत गोंयांत आशिल्ल्याचें कळ्ळें. पुलिसांनी गोंयांत येवन कळंगूट वाठारांतल्या अमन परमार (23, मध्यप्रदेश- इंदूर) ह्या तरणाट्याक अटक केली. दुबावीता कडल्यान एक मोबायल फोन आनी दोन सिम कार्डा जप्त केल्यात.
सोशल मिडियाचेर हॉटेल, रेस्टॉरंट, सिनेमा वा खंयच्याय पुस्तकाची वा नेमाळ्याची जायरात पळोवन रेटिंग दिवप मुंबयच्या एकल्याक बरेच म्हारग पडलें. पीडित जोगेश्वरींतल्या चप्पल कारखान्यांत सुपरवायझर म्हूण काम करता. ताका टेलिग्रामाचेर एक मेसेज आयलो, तातूंत ताका एका रेस्टॉरंटाक ऑनलायन रेटिंग करचे पडटले. ताचे बदला ताका दिसाक 5 ते 8 हजार रुपया मेळटले अशें बरयल्लें. ह्या हांयसाक लागून पिडीतान संदेशांत दिल्ल्या सुचोवण्यांक पाळो दिलो. सुरवेक ताका इनाम म्हणून 180 रुपया मेळ्ळें. ताका लागून तांणे त्या मनशाचेर विस्वास दवरलो. उपरांत ताका एनएसई (नॅशनल स्टॉक एक्सचेंज) च्या अधिकृत गुंतवणूक सायटी सारके दिसपी लिंकाचेर धाडलो. तशेंच ताका तें खरें दिसपाक जाय म्हूण खात्यांत बनावट बॅलेन्स दाखयलो.
पुलिसांच्या म्हणण्या प्रमाण, 12 जून ते 15 जून ह्या काळांत फटोवप्यांनी पिडिताक गुंतवणुकीचेर चड परतावो मेळटलो अशें सांगून परत परत पयशे हस्तांतरीत करपाक सांगलें. हे प्रक्रियेचेर विस्वास दवरून पिडितान गूगल पे आनी फोनपे वरवीं फटोवप्यांक वट्ट 6,09,884 रुपया धाडले. उपरांत ताणें जेन्ना संकेतथळार आपली शिल्लक रक्कम तपासली आनी ती काडपाचो यत्न केलो तेन्ना तो अपेशी थारलो. ताणें जायते फावट दुसऱ्या मनशा कडेन संपर्क करपाचो यत्न केलो तेन्ना ताका ताचो मोबायल बंद आशिल्ल्याचें दिसून आयलें. निमाणें आपली फटवणूक जाली हें लक्षांत येताच पिडितान ओशिवरा पुलिशेंत कागाळ दाखल केली. ते उपरांत ओशिवरा पुलिसांचो तपास पंगड गोंयांत पावलो आनी आरोपीक अटक केली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
