भांगरभूंय | प्रतिनिधी
आमी सांजवेळा शुभंकरोती वा हेर कसलीय प्रार्थना म्हणटात, रोझरी करतात, तेन्ना तातूंतल्यान आमकां शांतीकाय आनी समाधान मेळटा. पूण तीच प्रार्थना म्हणटना चुकीचो शब्द वापरलो जाल्यार आमकां जाण्ट्यां कडल्यान तापोवणी खावची पडटा. हें मतींत घेवन म्हैसुरांत स्थायिक जाल्ल्या गणेश खरे ह्या तरणाट्यान स्तोत्रांचो अर्थ सांगपाचो आॅनलायन उपक्रम सुरू केला. अर्थावांगडाच तो स्तोत्र कशें म्हणपाचें तें लेगीत सांगता. एक उदाहरण तो मुद्दाम सांगता, रामायण सगल्यांनी वांचलां, पळयलां आसतलें, तातूंत रावणाचो एक भाव आशिल्लो. कुंभकर्ण तो. स म्हयने न्हिदतालो आनी स म्हयने जागो रावतालो. हें कित्याक लागून जालें. तर एकदां खंय ताका देवान प्रसन्न जावन वरदान दिलें. त्या वेलार ताणें इंद्रपद मागपाचें थारायलें. पूण ताणें इंद्राच्या जाग्यार निद्रपद म्हणलें. देवान तथास्तु म्हणलें. मुखार कितें जालें? तर तो स म्हयने न्हिदपाक लागलो आनी स म्हयने जागो रावपाक लागलो. तुमच्या कडल्यानूय अशें चुकीचें उतर वचपाक शकता. ताका लागून स्तोत्रांचे उच्चार सारके जावचे म्हूण आॅनलायन वर्ग म्हत्वाचो आसा.
गणेश खरे कर्नाटकांतल्या वनवासी गांवांत जल्मला. गांवांत तो धावी मेरेन शिकलो. मागीर फुडल्या शिक्षणाक खातीर पुण्या भावा कडेन येवचें पडलें. ताचे आवय- बापूय शेतकार. पुण्या तो भटपण म्हणल्यार पुजा सांगपाचें काम करतालो. तेन्ना ताका साबार कोर्सांचीं जायतीं नांवां दिसतालीं. ताचे पिरायेचें लोक शिकतना दिसताले. एक दीस तो रांगोळी प्रदर्शनाक पावलो आनी ताचे भितरलो कलाकार जागो जालो. ताणें तें प्रदर्शन
बारीकसाणेन पळयलें आनी थारायलें की आपूणय अशीच रांगोळी घालपाक शिकतलों. रांगोळी कलाकार जगदीश चव्हाण, महादेव गोपाळ हे सारकिल्ले कलाकार ताका मेळ्ळे. ताणें वेळ करूंक ना.
शिकपाक सुरवात केली. पूण इतल्यान ताका भावा कडलें घर सोडचे पडटलें तेन्ना तो म्हैसूराक गेलो. फाविल्ल्या वेळाचो ताणें बऱ्या कामा खातीर वापर केलो. ताणें सरभोंवतणच्या भुरग्यांक रांगोळी शिकोवपाक सुरवात केली. मागीर तो स्तोत्र शिकोवंक लागलो. हाका लेगीत बरो प्रतिसाद मेळ्ळो. मागीर ताणें आॅनलायन वर्ग घेवपाक सुरवात केली. कोरोनाच्या काळांत ताका तें करचेंचच पडलें.
onlinepathshala.com वरवीं हे वर्ग सुरु केले. ताचे घरकान्नीन पूनमान ताका मजत केली. [email protected] ह्या मेलाचेर तो वर्ग घेता. सांजचो वेळ बरो पासार जाता म्हूण तो खोशी जाता. कांय जाण चुकीचें स्तोत्र म्हणटाले ते आतां सारके म्हणटात.
युट्युबाचेर सगल्योच गजाली सारक्यो आसतात म्हूण ना. ताका लागून गुरुच्या मुखांतल्यान आयकता तें खरें आसता. खास म्हणजे ती चूक तुमी पयस करूंक शकतात.
युट्यूबाचेर हें शक्य ना. जेन्ना ताणें म्हैसूराक वचपाचें थारायलें तेन्ना पूनम ओक हे ताचे घरकान्नीन ताका तेंको दिलो. ती धाडसी कल्पक बायल. आयज ती गणेशाची आदार जाल्या. ताका आॅनलायन वर्ग सांबाळपाक ती मजत करता. तांच्या वर्गाक बरो प्रतिसाद मेळटा. तुमकां गणेशाच्या वर्गाक जाॅयन जावपाचें आसल्यार शिरवाणातूच जाॅयन जावचें. कारण हो पवित्र म्हयनो. ते खातीर फोन क्रमांक आसा 96325 27107
चलात तर वर्ग जाॅयन करात आनी धडाधड स्तोत्रां शिकात.
प्रा रामदास केळकार
9822583275
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
