भांगरभूंय | प्रतिनिधी
पणजी : राज्यांतलीं महाविद्यालयां एक करून समुच्चय (क्लस्टर) विद्यापीठ स्थापन करपाची तरतूद आशिल्लें गोंय भौशीक विद्यापीठ विधेयक २०२५ चेर सभाघरांत फाल्यां चर्चा जातली. शिक्षणमंत्री ह्या नात्यान मुख्यमंत्री डॉ. प्रमोद सावंत हे विधेयक चर्चेक घेवन तें संमत करतले. ह्या विधेयकाक कॉंग्रेस सयत हेर विरोधी पक्ष फाटबळ दितले काय विरोध करतले, हाचे कडेन सगल्यांचें लक्ष आसा.
राज्यांत क्लस्टर विद्यापीठां स्थापन करपाचे हाचे पयलीं मुख्यमंत्री डॉ. सावंत हांणी सुचयिल्लें. महाविद्यालयांक अभ्यासक्रम तयार करपा वांगडा प्रस्नपत्रिका काडून निकाल जाहीर करपाचे अधिकार मेळटले. हाका लागून निकाल वेळार जाहीर जातले आनी अभ्यासक्रमांतूय मेकळेंपण निर्माण जातलें. तंत्रज्ञान तशेंच ज्ञानाच्या शाखांचो नेटान विस्तार जाता. बदलपी तंत्रज्ञाना कडेन जुळोवन घेवपा वांगडा रोजगारभिमुख अभ्यासक्रम तयार करपाची संद महाविद्यालयांतल्या प्राध्यापकांक मेळटली. कला, ग्रंथालय शास्त्र, फीजीक्स, केमेस्ट्री, गणीत, बॉटनी, इतिहास ह्या विशयांत एकठांय (इंटेग्रेटेड) अभ्यासक्रम सुरू जातलो. हाका लागून एकाच विद्यार्थ्याक लागींच्या दोन महाविद्यालयांनी अध्यापन करपाची संद मेळटली.
क्लस्टर विद्यापीठाक कुलपती, कुलगुरू, कुलसचीव, डीन, कुलसचीव, परीक्षा नियंत्रक अशीं पदां आसतलीं. राज्यपाल हेच विद्यापीठाचे कुलपती आसतले. कुलपती सरकाराच्या सल्ल्यान कुलगुरूची नेमणूक करतले. कुलगुरूं खातीर पात्रता आनी निवडीचे निकश सरकारा वतीन निश्चीत करतले.
उच्च शिक्षणाचो विचार केल्यार क्लस्टर विद्यापीठ (समुच्चय) हें एक क्रांतकारी पावल थारतलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
