भांगरभूंय | प्रतिनिधी
म्हापशें ः हणजूण पुलिसांनी आसगांवां धाड घालून ७.३० लाखांचो गांजो तशेंच ७ लाख रूपया जप्त केली. ह्या प्रकरणांत दुबावीत मक्सूद अहमद पटलू (५४, रा. आसगांव आनी मूळ श्रीनगर, जम्मू काश्मीर) हाका अटक केली.
ही घुवळे वखदां विरोधी कारवाय आयतारा मध्यानराती सुमार १२.२० ते सकाळीं ३.२५ वरांचेर केली. आसगांवच्या जामून बार ऍण्ड रेस्टॉरन्टा लागसार ड्रग्स विकपाचे आशिल्ल्याची म्हायती पुलिसांक विस्वासूं कडल्यान मेळ्ळी. ते प्रमाण ते सुवातेर पुलिसांनी सांपळो रचलो. दुबावीत ड्रग्स घेवन येतांच ताका पुलिसांनी धरलो. ह्या वेळार दुबाविता कडल्यान पुलिसांनी १ लाख १० हजारांचो १७७० किलोग्रॅम गांजो तशेंच ५ लाख ६० हजारांचो ५६ ग्रॅम हायड्रोपॉनीक गांजो जप्त केलो. हाचें दर ७ लाख ३० हजार रूपया अशं आसा. तशेंच दुबाविता कडेन ७ लाख रूपयाय मेळ्ळे. गाञजो आनी पयशे पुलिसांनी जप्त केले.
उपरांत घुवळे वखदां प्रतिबंधक कायद्या खाला गुन्यांव नोंद करून दुबावीत मक्सूद अहमद पटलू हाका अटक केली. पुलीस निरीक्षक सूरज गांवस हांच्या मार्गदर्शना खाला उपनिरीक्षक अमीर तरल आनी पंगडान हें काम केलें.
मजगतीं, म्हापशें न्यायालयान दुबाविताक ५ दीस पुलीस बंदखणीं दवरपाचो आदेश दिला.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
